الماتىدا كوپىردەن قۇلاعان كولىكتە بولعانداردىڭ جاعدايى اۋىر - باسقارما

الماتى. قازاقپارات - دارىگەرلەر كولىك اپاتىنان زارداپ ادامداردىڭ جاعدايى تۋرالى ايتتى، دەپ حابارلايدى قازاقپارات ءتىلشىسى.

الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، جول اپاتىنان جاراقات العاندار دەرەۋ جەدەل جاردەم قىزمەتىمەن ەمدەۋ مەكەمەلەرىنە جەتكىزىلدى.

«قالالىق اۋرۋحاناعا جەدەل جاردەممەن 4 ادام جەتكىزىلدى. ولارعا باس سۇيەك-مي جاراقاتى، سۇيەك سىنۋ جانە ءتۇرلى دارەجەدەگى دەنە جاراقاتتارى دياگنوزى قويىلدى. ءتيىستى مەديتسينالىق كومەك كورسەتىلگەن سوڭ زارداپ شەككەندەردىڭ ءبىرى امبۋلاتورلىق ەم قابىلداۋعا جىبەرىلدى، ۇشەۋى اۋرۋحاناعا جاتقىزىلدى. ونىڭ ەكەۋى جانساقتاۋ بولىمىندە جاتىر. قازىر جاعدايلارى اۋىر دەپ باعالاندى. تاعى ءبىر ادامنىڭ جاعدايى ورتاشا اۋىر دەپ باعالانعان. ول №7-قالالىق كلينيكالىق اۋرۋحانانىڭ نەيروحيرۋرگيا بولىمىنە جاتقىزىلدى»، - دەپ حابارلادى قالالىق دەنساۋلىق ساقتاۋ باسقارماسىنىڭ باسپا ءسوز قىزمەتى.

ەسكە سالايىق، كەشە رىسقۇلوۆ داڭعىلىنىڭ بويىمەن باتىس باعىتتا ءجۇرىپ كەلە جاتقان Volkswagen كولىگىنىڭ جۇرگىزۋشىسى مانيەۆر جاساۋ بارىسىندا Toyota كولىگىمەن سوقتىعىسىپ، سالدارىنان Toyota كوپىردەن قۇلادى.

اۆتور

الما مۇقانوۆا