ەدەن جۋۋشىنىڭ زاتتارىن بيۋللەتەن دەپ ويلاپ قالعان: الماتىداعى بايقاۋشى
بۇل تۋرالى بايقاۋشىلار مەكتەبىنىڭ جەتەكشىسى الەكساندر براتەنكوۆ بريفينگىدە ايتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، سايلاۋ ۋچاسكەلەرىندە ورەسكەل زاڭبۇزۋشىلىقتار تىركەلگەن جوق.
«الاتاۋ اۋدانىندا ورنالاسقان سايلاۋ ۋچاسكەلەرىنىڭ بىرىندە ەدەن جۋۋشى ءبىر زاتتارىن تاستاپ كەتىپتى. ونى ءبىر ادامدار بيۋللەتەن دەپ ويلاعان. ال المالى اۋدانىنداعى № 74-سايلاۋ ۋچاسكەسىندە سەنىمدى وكىل كانديداتتاردىڭ ءبىرىنىڭ پايداسىنا جاسىرىن ۇگىت جۇرگىزىپ جاتقانى بەلگىلى بولدى. نەگىزى سايلاۋ ۋچاسكەلەرىنە ايتارلىقتاي ورەسكەل زاڭبۇزۋشىلىق انىقتالعان جوق»، - دەيدى الەكساندر براتەنكوۆ.
ايتۋىنشا، الماتىدا سايلاۋعا مونيتورينگ جۇرگىزۋ ءۇشىن بايقاۋشىلار مەكتەبى 1723 ادامدى دايىندادى.
بايقاۋشىلار ميسسياسى - ءادىل جانە اشىق سايلاۋ وتكىزۋگە كەدەرگى كەلتىرەتىن كەز كەلگەن قۇقىق بۇزۋشىلىقتى باقىلاۋ، تۇزەتۋ جانە الدىن الۋ.
«سايلاۋ تەك كانديداتتارعا، داۋىس بەرۋشىلەرگە عانا ەمەس، تاۋەلسىز بايقاۋشىلارعا دا جاۋاپكەرشىلىك جۇكتەيدى. مەن جانە ارىپتەستەرىم تاۋەلسىز بايقاۋشىلاردى تاڭداپ، وقىتتىق. تاۋەلسىز بايقاۋشىلاردىڭ قۇرامىنا ءارتۇرلى ادامدار كىردى. ولار - جاستار، ەگدە جاستاعى ادامدار جانە ءارتۇرلى الەۋمەتتىك توپ وكىلدەرى»، - دەيدى ول.
ونىڭ ايتۋىنشا، الماتىدا سايلاۋدى باقىلاۋ بويىنشا 8 قوعامدىق ۇيىم اككرەديتاتسيادان ءوتتى.
«بايقاۋشىلاردىڭ ءبارى بىردەي سايلاۋ پروتسەسىن ساۋاتتى جانە بىلىكتى تۇردە باقىلاي المايدى. مىنە سول سەبەپتى، الماتىدا «داۋىس» قوعامدىق بايقاۋشىلار كواليتسياسىنىڭ باستاماسىمەن بايقاۋشىلار مەكتەبى قۇرىلدى - بۇل رەسپۋبليكالىق قوعامدىق بىرلەستىك»، - دەپ ءبولىستى سپيكەر.
بايقاۋشىلار مەكتەبىنىڭ ترەنەرى ساۋلە الپىسوۆانىڭ ايتۋىنشا، ولاردى دايىنداۋ بارىسىندا اقپارات كەڭىستىگى مەن الەۋمەتتىك جەلىدەگى جۇمىسقا ەرەكشە كوڭىل ءبولىندى.
«اقپاراتپەن جۇمىس ىستەۋ، اتاپ ايتقاندا اقپاراتتى دۇرىس جەتكىزۋ جانە الەۋمەتتىك جەلىلەردە جۇمىس ىستەۋ بويىنشا ترەنينگ وتكىزدىم. اقپاراتپەن تەك جۋرناليستەر عانا ەمەس، بايقاۋشىلار دا جازىپ، جۇمىس ىستەي ءبىلۋى كەرەك»، - دەدى ول.
اۆتور
الما مۇقانوۆا
