ماڭعىستاۋلىق كەلىنشەك ۇشەمىن ەرتىپ، داۋىس بەرۋگە كەلدى

اقتاۋ. قازاقپارات - ماڭعىستاۋ وبلىسى مۇنايلى اۋدانىنىڭ تۇرعىنى «كۇمىس القا» يەگەرى گۇلسارا ۆاپايەۆا سايلاۋ ۋچاسكەسىنە 5 جاستان اسقان ۇشەم ەربول، نۇربول، ىڭكارمەن بىرگە كەلدى، دەپ حابارلايدى قازاقپارات ءتىلشىسى.

«بۇگىن ەرتە تۇرىپ، سايلاۋعا كەلدىك. وسىنداي شەشۋشى ساتتەن قالىس قالماۋىمىز قاجەت دەپ تاپتىق. ويتكەنى بالالارىمىزدىڭ ەرتەڭى بۇگىن سايلاناتىن دەپۋتاتتارعا، ولار قابىلدايتىن زاڭدارعا تىكەلەي بايلانىستى. بالالارىمىزدىڭ بولاشاعى جارقىن بولسىن دەگەن نيەتپەن تاڭداۋ جاسادىق»، - دەيدى ول.

بۇگىندە گۇلسارا ۆاپايەۆا اۋلەتتىڭ ءتۇتىنىن جاعىپ وتىرعان اياۋلى كەلىن، ارداقتى انا. التى بالاسى بار. ۇل-قىزدارىنىڭ الدى 5-سىنىپتا وقىسا، كىشىسى - بەسىكتە.

ساياسي ناۋقاندا بەلسەندىلىك تانىتقان ۇشەمنىڭ اتا-اناسىنا ەستەلىك سىيلىقتار تابىستالدى.

جالپى ماڭعىستاۋ وڭىرىندە بۇگىن 247 سايلاۋ ۋچاسكەسى جۇمىس جاساپ جاتىر. ونىڭ تورتەۋى قايتا قۇرىلعان. 52 نىڭ شەكاراسى وزگەرتىلگەن. وبلىستا 418002 سايلاۋشى تىركەلگەن، ونىڭ ىشىندە 20579 تۇرعىننىڭ مۇگەدەكتىگى بار.

اۆتور

ينديرا ساتەنباي