اقتوبەدە تابىلعان عۇن ءداۋىرى بۇيىمدارىن رەكونسترۋكسيالاۋ باستالدى - فوتو
رەكونسترۋكسيا ارادا بەس جىل وتكەندە باستالىپ وتىر، دەپ حابارلايدى قازاقپارات ءتىلشىسى.
رەكونسترۋكتسيا جۇمىستارىن بەلگىلى ارحەولوگ-عالىم، ءا. مارعۇلان اتىنداعى ارحەولوگيا ينستيتۋتىنىڭ جەتەكشى عىلىمي قىزمەتكەرى ارمان بيسەمبايەۆ، ەتنوگراف- عالىم، سۋرەتشى قاليوللا احمەتجان جانە اتالعان ينستيتۋتتىڭ ءبولىم مەڭگەرۋشىسى اسلان مامەدوۆ جۇرگىزەدى.
«دەرەكتەرگە سۇيەنسەك، اقتوبە عۇنداردىڭ مەكەندەگەن ورتالىعى بولعان. ەۋروپاعا قونىس اۋدارعانعا دەيىن اقتوبە وڭىرىندە ءومىر سۇرگەن. ولاردىڭ مادەنيەتى دە ەرەكشە بولىپتى.
سونىڭ بىرەگەيى - ەلەك وزەنى بويىنان تابىلعان عۇن داۋىرىنە جاتاتىن جاۋىنگەردىڭ ولجالارى. تابىلعان ارتەفاكتىلەردى رەكونسترۋكتسيالاۋ جۇمىستارى باستالدى. ونىڭ ىشىندە جاۋىنگەردىڭ كيىم- كەشەگى، قارۋ- جاراعى مەن ات ابزەلدەرى بار»، - دەيدى اسلان مامەدوۆ.
ەسكە سالساق، سول كەزدە وبلىستىق تاريحي- ولكەتانۋ مۋزەيىنىڭ ديرەكتورى مەيرام نۇرلان ۇلى ارحەولوگتار قازبا جۇمىستارىن جۇرگىزگەنىن، تابىلعان زيرات ءبىزدىڭ زامانىمىزعا دەيىنگى II-IV عاسىرلارعا جاتاتىنىن ايتقان ەدى.
«ول جەرگە بەدەلدى ادامنىڭ جەرلەنگەنىن ايتۋعا بولادى. ادامنىڭ سۇيەگى جاتقان جەردە باعالى مەتالدان جاسالعان بۇيىمدار بار. اتتىڭ ەرىن سارى ءتۇستى مەتالدان اشەكەيلەگەن. باس كيىمى نەمەسە كيىمى دە سارى ءتۇستى مەتالمەن كومكەرىلگەن. قازىر ءبارىن جيناپ الىپ، مۋزەيدىڭ قورىنا ساقتاپ وتىرمىز. تىركەۋ جۇرگىزىلىپ، قالپىنا كەلتىرۋ باستالادى، - دەدى ول.
اۆتور
التىناي ساعىندىقوۆا
