استانانىڭ مەكتەپتەرى مەن كوللەدجدەرىندە ءبىر ۋاقىتتا قازاق كۇيلەرى ورىندالدى

استانا. قازاقپارات - بۇگىن ەلوردانىڭ بارلىق ءبىلىم بەرۋ ۇيىمىندا استانا ۋاقىتى بويىنشا ساعات 12:00 دە «كۇي كۇمبىرى» اتتى دومبىراشىلار چەللەندجى ءوتتى، دەپ حابارلايدى قازاقپارات قالا اكىمدىگىنىڭ رەسمي سايتىنا سىلتەمە جاساپ.

اكسيا وقۋ-اعارتۋ مينيسترلىگىنىڭ باستاماسىمەن ۇيىمداستىرىلدى. ماقسات - ءبىلىم الۋشىلاردىڭ رۋحاني مادەنيەتىن، ەستەتيكالىق، پاتريوتتىق رۋحىن ارتتىرۋ، ەلدىڭ مادەني مۇراسىن ساقتاۋ، بالالاردىڭ دومبىرا تارتۋ ونەرىن ناسيحاتتاۋ.

چەللەندجگە قالانىڭ 127 ءبىلىم بەرۋ مەكەمەسىنەن 3 مىڭنان اسا دومبىراشى قاتىستى. ولار قۇرمانعازىنىڭ «بالبىراۋىن» كۇيىن تارتتى.