شەتەلدە تۇراتىن قازاق بالالارى بيىل دا قازاقستانعا جازعى لاگەرگە كەلە الادى
«وتانداستار قورىنىڭ» ۇيىمداستىرۋىمەن وتەتىن جازعى لاگەر جوباسى العاش رەت 2019 -جىلى استانا قالاسىنداعى نازاربايەۆ زياتكەرلىك مەكتەبى بازاسىندا وتكەن ەدى.
وعان 7 مەملەكەتتەن 150 ەتنيكالىق قازاق بالاسى قاتىستى.
2020-2021 -جىلدارى COVID-19 پاندەمياسىنا بايلانىستى جوبا وتكىزىلمەگەنىمەن، 2022 -جىلى بۋراباي تورىندەگى «ىQanat» مەكتەپ بازاسىندا ۇيىمداستىرىلىپ، فرانسيا، تۇركيا، يران، قىرعىزستان، وزبەكستان، قىتاي، موڭعوليا، رەسەي سىندى 8 مەملەكەتتەن جالپى سانى 84 بالا قاتىستى.
بۇل جوبا بيىل دا ءوز جالعاسىن تاپپاق.
2023 -جىلى 1-شىلدەدەن 14-شىلدەگە جالعاسقان قازاقي جازعى لاگەر باعدارلاماسىندا بالالار اتقا ءمىنۋ، ساداق اتۋ، اسىق ويناۋ، كيىز ءۇي تىگۋ، ۇلتتىق اسپاپتا ويناۋ، ينتەنسيۆتى فورماتتا قازاق ءتىلىن ۇيرەنۋ سياقتى ۇلتتىق قۇندىلىقتارمەن قاتار موبيلوگرافيا سياقتى زاماناۋي ساباقتاردان ءبىلىمىن جەتىلدىرەدى.
سونىمەن قاتار، ۇزدىك ۋنيۆەرسيتەتتەردىڭ ءبىلىم كورمەسىندە قازاقستاندا وقۋ مۇمكىندىكتەرىمەن تانىسىپ، بەلگىلى تۇلعالاردىڭ ماستەر كلاسى مەن تانىمال جۇلدىزداردىڭ قاتىسۋىمەن وتەتىن كونسەرتتى تاماشالاي الادى.
«جازعى لاگەر» جوباسىنا قالاي قاتىسۋعا بولادى؟ ول ءۇشىن «وتانداستار قورى» 12-17 جاسار شەتەلدەگى ەتنيكالىق قازاق بالالارى اراسىندا وتكىزەتىن ونلاين بايقاۋعا قاتىسىپ، تەگىن جولداما ۇتىپ الۋعا مۇمكىندىك بار.
View this post on Instagram