شاۆكات راحمونوۆ مەملەكەتتەن قارجىلاندىرۋ الدى - مينيستر سپورتشىمەن كەزدەستى

الماتى. قازاقپارات - ەرەجەسىز جەكپە-جەك شەبەرى شاۆكات راحمونوۆقا سپورتتى قولداۋ قورىنان قارجىلاندىرۋ بولىنەدى.

بۇل تۋرالى مادەنيەت جانە سپورت ءمينيسترى اسحات ورالوۆ ءمالىم ەتتى، دەپ حابارلايدى قازاقپارات.

«بۇگىن قازاقستان سپورتىنىڭ جارقىن جۇلدىزدارىنىڭ ءبىرى - شاۆكات راحمونوۆپەن جەكە كەزدەستىم. ءبىزدىڭ جاۋجۇرەك سپورتشىمىز بىرىنەن سوڭ ءبىرى جەڭىسكە جەتىپ، UFC- ءدى باتىل قادامدارىمەن باعىندىرىپ، وتانداستارىنىڭ جۇرەگىنە ماقتانىش سەزىمىن سىيلاپ كەلەدى.

مەن شاۆكاتتى جاقىندا امەريكالىق دجەفف نيلمەن بولعان جەكپە-جەكتە جەڭىسىمەن تاعى دا قۇتتىقتادىم جانە وعان العىس حات تابىستادىم. سونداي-اق ول كەلەسى جەكپە-جەكتەرگە دايىندالۋ ءۇشىن سپورتتى قولداۋ قورىنان قارجىلاندىرىلاتىن بولادى.

شاۆكات بۇكىل الەمگە قازاقستاندى پاش ەتتى جانە وسى قادامى ءۇشىن ءبىز وعان ايرىقشا العىسىمىزدى جەتكىزەمىز. ونىڭ UFC چەمپيوندىق بەلبەۋىن جەڭىپ الۋىنا تىلەكتەسپىن، تولاعاي تابىس تىلەيمىن»، - دەپ جازدى مينيستر Facebook-تەگى جەكە پاراقشاسىندا.

ەسكە سالايىق، 5- ناۋرىز كۇنى تاڭەرتەڭ لاس-ۆەگاستا (ا ق ش، نيەۆادا شتاتى) وتكەن UFC 285 تۋرنيرىندە شاۆكات راحمونوۆ امەريكالىق دجەفف نيلدى (15-5) بۋىندىرۋ تاسىلىمەن جەڭدى.

قازاقستاندىق ءۇشىن بۇل ءوز مانسابىنداعى 17- جەڭىس بولدى، سونداي-اق ول بۇكىل جەكپە-جەكتەرىن مەرزىمىنەن بۇرىن اياقتاعان.

جارتىلاي ورتا سالماقتاعى رەيتينگىدە راحمونوۆ 6-ورىنعا كوتەرىلدى.