ەۋرووداق قازاقستاننان بالىق ونىمدەرىن ساتىپ الاتىن بولدى

استانا. قازاقپارات - ەۋرووداق قازاقستان كومپانيالارىنىڭ بالىق ونىمدەرىن ساتىپ الۋعا دايىن. بۇل تۋرالى اۋىل شارۋاشىلىعى ءمينيسترى ەربول قاراشوكەيەۆ جەلىدەگى پاراقشاسىندا جازدى، دەپ حابارلايدى قازاقپارات.

«وتاندىق بالىق ونىمدەرى ەندى ەۋروپا تۇتىنۋشىلارىنىڭ ۇستەلىنەن ءجيى تابىلاتىن بولادى. ەكى اپتا بۇرىن بريۋسسەلگە جاساعان ساپارىم كەزىندە ونداعى ەۋروكوميسسارلارمەن ىسكەرلىك كەزدەسۋلەر تۋرالى ايتقان ەدىم. ءبىز ەۋروپالىق وداق ەلدەرىنە قازاقستاندىق بالىق ونىمدەرىن جەتكىزۋ تۋرالى كەلىسسوزدەر جۇرگىزگەن ەدىك. ناتيجە بار. بۇگىن ەۋروپالىق كوميسسيا قازاقستاندىق ۆەتەريناريالىق باقىلاۋ جۇيەسىنە دەگەن سەنىمىن قالپىنا كەلتىرۋ تۋرالى نيەتىن جەتكىزدى. بۇل دەگەنىمىز ەرتەڭ، 15- ناۋرىزدان باستاپ قازاقستاندىق كومپانيالاردى ەۋرووداققا ەكسپورتتاۋعا قۇقىعى بار كاسىپورىندار تىزىمىنە ەنگىزۋ ءراسىمىن قايتا باستايدى. بۇل تىزىمدە 17 وتاندىق مەكەمە بار»، - دەپ جازدى مينيستر.

سونىمەن قاتار ەربول قاراشوكەيەۆ اتالعان پروتسەستىڭ قىسقاشا تاريحىن دا ايتىپ بەردى.

«وسىدان 5 جىل بۇرىن ەۋروكوميسسيا قازاقستاندىق بالىق زاۋىتتارىنا اۋديت جۇرگىزگەن بولاتىن. ونىڭ قورىتىندىسى بويىنشا 11 ۇسىنىس پەن ەسكەرتۋلەر بەرىلدى، ونىڭ ىشىندە قازاقستاننىڭ ۆەتەريناريالىق قىزمەتى ءۇشىن دە ايتار كەڭەستەرى بولعان. كەيىنگى جىلدارى ءبىز وسى ۇسىنىستارى بويىنشا ناتيجەلى جۇمىس ىستەپ، ە و- عا ەگجەي-تەگجەيلى ەسەپتى جىبەردىك. بۇگىن مىنە، راستاۋ كەلدى: ەۋرووداق قازاقستان كومپانيالارىنىڭ بالىق ونىمدەرىن ساتىپ الۋعا دايىن! ەندىگى كەزەكتە بال ونىمدەرى تۇر. ەۋروپالىق كوميسسيا بال تۋرالى ساۋالناما جىبەردى. ەگەر بارلىق تالاپتار مەن ستاندارتتار سايكەس كەلسە، وندا وتاندىق ومارتاشىلار ءۇشىن دە ەۋروپا نارىعى اشىلادى دەگەن ءسوز»، - دەپ تولىقتىردى ا ش م.