پرەمەر-مينيستر: مەملەكەت جاستارعا ەرەكشە كوڭىل ءبولىپ وتىر
«مەملەكەتتىك ساياساتتىڭ نەگىزگى باسىمدىقتارىنىڭ ءبىرى جاستاردى جۇيەلى تۇردە قولداۋ بولىپ تابىلادى. سوندىقتان مەملەكەتتىك جاستار ساياساتىنىڭ جاڭا تۇجىرىمداماسىن قابىلداۋ وتە ماڭىزدى. ەڭ الدىمەن، جاستاردى جۇمىسقا ورنالاستىرۋدىڭ جۇيەلى ءتاسىلى قاجەت. تۇجىرىمدامادا 2,3 ميلليونعا جۋىق جاستاردى جۇمىسپەن قامتۋ جوسپارلانعان. بۇل - وتە ماڭىزدى اسپەكت، ونى بارىنشا ءتيىمدى جۇزەگە اسىرۋ كەرەك»، - دەدى ق ر پرەمەر-ءمينيسترى ءاليحان سمايىلوۆ ۇكىمەتتىڭ بۇگىنگى وتىرىسىندا.
پرەمەر-مينيستر جاستارعا ارنالعان جوبالار مەن باعدارلامالاردى ىسكە اسىرۋعا مەملەكەت ەرەكشە كوڭىل ءبولىپ وتىرعانىن ايتتى.
«جاستاردىڭ مۇنداي باعدارلامالارعا قاتىسۋىن كەڭەيتۋ NEET ساناتىنداعى جۇمىس ىستەمەيتىندەر مەن وقىمايتىنداردىڭ سانىن ازايتۋعا ىقپال ەتەدى. ەلدەگى مۇنداي جاستاردىڭ ۇلەسى %6 تەن اسادى. ۇلىتاۋ، شىعىس قازاقستان جانە قاراعاندى وبلىستارىندا NEET كورسەتكىشتەرى ەڭ جوعارى. تۇجىرىمدامادا رەسپۋبليكا بويىنشا وسىنداي جاستاردىڭ ۇلەسىن %3,5 كە دەيىن تومەندەتۋ مىندەتى قويىلعان. ءبىراق بۇل ءۇشىن «شابلونمەن» جۇمىس ىستەۋگە بولمايدى. ءار وڭىردەگى جاستارمەن جۇمىس ىستەۋ ەرەكشەلىگىنە بارىنشا يكەمدەلۋ قاجەت»، - دەدى ءا. سمايىلوۆ.
سونىمەن قاتار پرەمەر جاستاردى قولداۋ شارالارىن جاقسارتۋ، كاسىپكەرلىككە تارتۋ، ءوز كاسىبىن باستاۋعا كومەكتەسۋ ءۇشىن ۇزبەي جۇمىس ىستەۋ كەرەگىن ايتتى.
«وسىعان بايلانىستى اقپارات جانە قوعامدىق دامۋ مينيسترلىگى ءوڭىر اكىمدىكتەرىمەن بىرلەسىپ، اقپاراتتىق جۇمىستى كۇشەيتۋى كەرەك. جاستارىمىزدىڭ ءارقايسىسىنا، اسىرەسە اۋىلدارداعى جانە NEET ساناتىنداعى جاستارعا كوڭىل ءبولۋ قاجەت. اركىم تابىسقا قول جەتكىزۋ، جۇمىسقا ورنالاسۋ، كاسىپتىك دەڭگەيىن كوتەرۋ مۇمكىندىگىن سەزىنە ءبىلۋى كەرەك. اكىمدىكتەرمەن بىرلەسىپ، جاستار رەسۋرستىق ورتالىقتارىنىڭ قىزمەتىن ساپالى ۇيلەستىرۋ كەرەك. ورتالىقتاردىڭ باسشىلارىنا ناقتى مىندەتتەر مەن KPI بەكىتۋ قاجەت.
ۇشىنشىدەن، قازىر ۆولونتەرلەر قوزعالىسى ايتارلىقتاي جانداندى. ۆولونتەرلەردى تارتۋ اياسىن كەڭەيتىپ، جاڭا جوبالار مەن اكسيالاردى ىسكە قوسقان ءجون. جاستاردى ادامگەرشىلىك جانە پاتريوتتىق رۋحتا تاربيەلەۋگە، سپورت پەن سالاماتتى ءومىر سالتىن ناسيحاتتاۋعا ەرەكشە نازار اۋدارۋ قاجەت»، - دەدى ۇكىمەت باسشىسى.
