ەۋرووداق ەلدەرى بىرلەسىپ گاز ساتىپ الۋعا كىرىستى

بۇل تۋرالى قازاقپارات euronews اگەنتتىگىنە سىلتەمە جاساپ حابارلايدى.

«بەيسەنبى كۇنى كۇندىز بەلگىلى بولعان جيىنتىق سۇرانىس ازىرگە ءۇش جىلعا 23-24 ميلليارد كۋبومەتر بولىپ وتىر. وداققا مۇشە ەلدەردىڭ نەگىزگى گاز وپەراتورلارى كەلەسى قىستا مۇمكىندىگىنشە كوبىرەك گازبەن قامتاماسىز ەتۋ ءۇشىن ءبارىن ىستەپ جاتىر. قۇبىر گازىمەن قاتار، سۇيىلتىلعان تابيعي گاز دا ساتىپ الىنادى. كومپانيالار ونى جەكە ءوزى نەمەسە بىرلەستىك ارقىلى جاسايدى. ءبىراق كەلىسىمشارت ورناتقانى تۋرالى كەلىسسوزدەر ە و پلاتفورماسىنان تىس جۇرگىزىلەدى. الىنعان گاز قولدانۋ جانە قويمالاردى تولتىرۋ ءۇشىن قاجەت»، - دەپ اتاپ ءوتتى ەۋروكوميسسيانىڭ ۆيتسە-ءتوراعاسى ماروش شەفچوۆيچ.

جوسپار ەۋرووداققا مۇشە ەلدەردىڭ سۇرانىسىن بىرىكتىرىپ، ونى حالىقارالىق جەتكىزۋشىلەردىڭ ۇسىنىسىمەن سايكەستەندىرۋدى كوزدەيدى. مۇنداي شارا گاز باعاسىن تومەندەتۋگە جانە شاعىن مەملەكەتتەرگە جاھاندىق باسەكەلەستىكتە كومەكتەسەدى. ء«بىز وتە مۇقيات بولىپ، جەتكەن جەتىستىكپەن توقتاپ قالماۋىمىز كەرەك. سەبەبى وتە قيىن كەزەڭدە ءومىر ءسۇرىپ جاتىرمىز. ءبىز جەتكىزۋشى نەمەسە ينفراقۇرىلىم تاراپىنان بولعان كەز كەلگەن وندىرىستىك وقيعا ۇلكەن ماسەلە تۋدىرۋى مۇمكىن قاتال نارىقتا ارەكەت ەتىپ جاتىرمىز. سول سەبەپتى ارنايى قورمەن جۇمىس ىستەپ، جەتكىزۋ سەنىمدىلىگىنە قاتىستى وتكەن جىلداعىداي ديلەممالارعا تاپ بولمايتىنىمىزعا سەنىمدى بولۋىمىز كەرەك»، - دەپ تولىقتىردى ماروش شەفچوۆيچ.