ورالحان بوكەيدىڭ مۋزەي ءۇيى مەملەكەت مەنشىگىنە بەرىلەتىن بولدى

شىعىس قازاقستان وبلىسى كاتونقاراعاي اۋدانىنداعى شىڭعىستاي اۋىلىندا كورنەكتى جازۋشى ورالحان بوكەيدىڭ جاس شاعى وتكەن مۋزەي-ءۇي بار. بۇگىنگە دەيىن بوكەي اۋلەتىنىڭ قارا شاڭىراعى قۇجات جۇزىندە جەكەنىڭ مەنشىگىندە بولىپ كەلدى. كەيىنگى جىلدارى جەكە مەنشىكتەگى نىساندى كۇتىپ ۇستاۋعا بيۋجەتتەن اقشا ءبولۋ زاڭعا تومپاق بولعاندىقتان، مادەني-تاريحي نىساننىڭ كەتەۋى كەتىپ بارا جاتقانى تۋرالى ماسەلە ءجيى كوتەرىلىپ جۇرگەن. سول ماسەلە وتكەن ايدا شەشىمىن تاۋىپ، مۋزەي-ءۇي مەملەكەت بالانسىنا بەرىلەتىن بولىپتى.

بۇل مالىمەتتى كاتونقاراعاي اۋدانىنىڭ اكىمى ءدىلدار قاليقان راستادى.

«نىساندى «كاتونقاراعايدى تۇراقتى دامىتۋ قورى» ساتىپ الدى. دەمەك، قازىر مۋزەي-ءۇي سول قوردىڭ بالانسىندا تۇر. قور سول ءۇشىن 10 ميلليون تەڭگە تولەپ، ساتىپ الدى. اقپان ايىندا ءۇي يەسى كەلىپ، كىلتتى تابىستادى. كەلىسىمشارت جاسالىپ، نوتاريۋس بەكىتتى. ەندى ءۇيدى قالپىنا كەلتىرۋ جۇمىستارىن باستايمىز. اۋلاسىن، ءۇيدىڭ ءىشىن، ءبارىن قالپىنا كەلتىرۋ كەرەك. ودان كەيىن جوسپار بويىنشا وبلىستىق ولكەتانۋ مۋزەيىنىڭ ءبىر فيليالى بولىپ اشىلادى. ياعني، تولىقتاي مەملەكەت مەنشىگىنە بەرىلەدى. ول ءۇشىن مۋزەي قورىندا مىڭنان استام دەرەك بولۋ كەرەك دەگەن سياقتى تالاپتارى بار ەكەن. قازىر سونىڭ ءبارى جيناستىرىلىپ جاتىر.

وسى جۇمىستىڭ ءبارى ويداعىداي بىتسە، مامىر ايىنا قاراي نىسان كەلۋشىلەرگە ەسىگىن اشاتىن شىعار. ونىڭ ۇستىنە اۋلاسىندا تۇرعان جازۋشى ءمۇسىنىن جاڭالاساق دەپ وتىرمىز. تاپسىرىس بەرىلگەن، جاساتىپ جاتىرمىز. نىساندى قالپىنا كەلتىرۋ جۇمىستارى قانداي قاراجاتقا اتقارىلاتىنىن دا قاراستىرىپ جاتىرمىز»، - دەدى اۋدان اكىمى.

جازۋشىنىڭ تۋعان قارىنداسى عاليا بوكەي قىزى دا اكىمدىكتىڭ نىساندى كۇتىپ ۇستاۋ تۋرالى ۇستانىمىن قولدايتىنىن ايتتى.

«وسى ماسەلە بويىنشا اۋدان اكىمىمەن ەكى رەت اقىلداستىم. مەنىڭ باستى قويعان تالابىم - مۋزەي ءۇي وبلىستىڭ بالانسىندا بولۋى كەرەك ەدى. ويتكەنى اۋدان بالانسىندا بولعان كەزدە قاراۋسىز قالعان جايتتار بولعان. اۋدانعا رۋحانياتتى تۇسىنەتىن ادام باسشى بوپ كەلسە، مۋزەيگە اقشا بولىنەدى دە، رۋحانياتتان الىس ادام كەلسە، اقشا بولىنبەي قالادى. بۇل تالابىما اكىمدىك كونىپ وتىر. نىسان وبلىستىڭ نىسانىندا بولعاندىقتان، وبلىستىق بيۋجەتتەن قارجىلاندىرىلادى. مۋزەيدىڭ شتات سانى تۋرالى تالابىم دا قولداۋ تاپتى. اۋلاداعى ءمۇسىنى وعاشتاۋ بولاتىن. ونى دا جاڭالاۋعا ۋادە بەرىپ وتىر. وسىنىڭ ءبارىن ەسكەرىپ، قارا شاڭىراعىمىزدى مەملەكەت بالانسىنا بەرۋگە كەلىسىم بەردىم. ۇيدەگى ەكسپوناتتار مەن قۇجاتتاردى، ءوز قولىمدا بولعان مۇرانىڭ ءبارىن قاعازعا ءتىزىپ، ارنايى اكت جاساپ، رەسمي تابىستادىم»، - دەدى ول.

ەسكە سالايىق، بيىل ورالحان بوكەيدىڭ تۋعانىنا 80 جىل تولادى.