نۇرلان اۋەسبايەۆ تەلەدەباتتا قانداي ماسەلەلەردى كوتەردى
«ءبىرىنشى كەزەكتە تەگىن مەديتسينالىق قىزمەت، ءبىلىم، ازاماتتاردىڭ ىڭعايلى باسپاناسىن قامتاماسىز ەتۋ، زەينەتاقى، جالاقى، جاردەماقىلاردى كوتەرۋ، جۇمىسپەن قامتۋ، بانك سالاسىنداعى جوعارى نەسيەلەردىڭ ءبارىن تومەندەتۋ ماسەلەلەرى تۇر»، - دەدى ن. اۋەسبايەۆ تەلەدەباتتا.
پارتيا وكىلى بۇل ماسەلەلەردىڭ شەشىلمەۋىنىڭ سەبەبى - جەمقورلىق دەپ اتاپ ءوتتى.
سونداي-اق ول كەزەك كۇتتىرمەيتىن ءۇش ماسەلەنى اتادى.
«قازاقستاندىقتاردىڭ ءومىر ساپاسى ستاندارتتارىن ەنگىزۋ، ول عىلىمي تۇرعىدا ەۋروپا ەلدەرىنەن الىنعان. ەلدەگى ەڭ ءالجۋاز، از قامتىلعان ادامنىڭ ءوزى ناقتى ستاندارتتارعا ساي بولۋى كەرەك. ول قازىرگىدەي تۇتىنۋشىلىق سەبەت قانا ەمەس، ءدارى-دارمەكپەن، دەمالىسپەن قامتىلۋى كەرەك، تاماقتانۋى، كيىمى، باسقاسى دا بار. بۇل ستاندارتتىڭ ساقتالۋىنا بارلىق مينيسترلىكتى مىندەتتەۋ كەرەك. ەكىنشىدەن، وليگارحيالىق جۇيەدەن ارىلۋ كەرەك. قازاقستاندا ءبارى بولسا دا، ەلىمىز كەدەي تۇرادى. ويتكەنى باقىلاۋ جوق، بايلىقتى مەملەكەتكە قايتارۋ كەرەك»، - دەدى ول.
سوڭعى كەزەڭدە پارتيا وكىلدەرى حالىققا ۇندەۋ جاساپ، داۋىس بەرۋگە شاقىردى.
«ەلىمىز اۋىر كەزەڭدى وتكەرۋدە. قىمباتشىلىق كۇننەن-كۇنگە شارىقتاۋ شەگىنە جەتىپ بارادى. سوندىقتان ءقازىر ايتىلعان بارلىق ماسەلەلەردى قورىتىندىلاپ، قوسىمشا تاعى ايتارىم - پارلامەنتكە تەرگەۋ جۇمىستارىن جۇرگىزۋ كەرەك. ويتكەنى پارلامەنتتىڭ ءۇنسىز جۇرگەنىنىڭ سالدارىنان جەمقورلىق جايلاپ الدى. ءبىز بارلىق ماسەلەنى باقىلاۋدا ۇستاۋىمىز كەرەك، ول حالىقتىق باقىلاۋ بولۋى كەرەك. سوندا عانا جاقسى دارەجەلەرگە جەتەمىز. ءبىز ۇزدىكسىز جەمقورلىقپەن كۇرەسەمىز. ەلدىڭ بايلىعىن مەملەكەتكە قايتارۋعا تىرىسامىز»، - دەدى ن. اۋەسبايەۆ.
ەسكە سالا كەتەيىك، «Qazaqstan» ۇلتتىق ارناسىنىڭ تىكەلەي ەفيرىندە ءماجىلىس سايلاۋىنا قاتىساتىن 7 ساياسي پارتيا وكىلدەرىنىڭ اراسىندا وتكەن پىكىرسايىس بىرەر ساعات بۇرىن اياقتالدى. وعان «Amanat» پارتياسىنان ەلنۇر بەيسەنبايەۆ، «اۋىل» حالىقتىق دەموكراتيالىق پارتياسىنان جيگۋلي دايرابايەۆ، Respublica پارتياسىنان سىرىمبەك تاۋ، قازاقستان حالىق پارتياسىنان اسحات اسىلبەكوۆ، «بايتاق» جاسىلدار پارتياسىنان ازاماتحان امىرتايەۆ، «اق جول» دەموكراتيالىق پارتياسىنان بەرىك دۇيسەمبينوۆ، ال جالپىۇلتتىق سوتسيال-دەموكراتيالىق پارتياسىنان نۇرلان اۋەسبايەۆ قاتىستى.
