اق جول پارتياسى تەلەدەباتتا قانداي ماسەلە كوتەردى

بۇل تۋرالى «Qazaqstan» ۇلتتىق ارناسىنىڭ تىكەلەي ەفيرىندە وتكەن پىكىرسايىستا «اق جول» دەموكراتيالىق پارتياسىنىڭ وكىلى بەرىك دۇيسەمبينوۆ ايتتى، دەپ حابارلايدى قازاقپارات ءتىلشىسى.

«وسىدان 100 جىل بۇرىن الاش ارىستارى: «قازاقتىڭ تاسى كەۋدەسىنە تۇيمە بولىپ قادالۋى كەرەك. قازاقتىڭ قويىنىڭ ءجۇنى يىعىنا شەكپەن بولىپ جابىلۋى ءتيىس»، دەپ ايتىپ كەتكەن. وكىنىشكە وراي، بىزدە ناقتى ەكونوميكانىڭ ورنىنا سلايد كورسەتەدى. حالىقتىڭ قارجىسى شىعىندالعان كاسىپورىن، باعدارلاما سۋعا كەتىپ جاتىر. ءبىزدىڭ ماقساتىمىز وسىنى ناقتى قايتارۋ. ول دەگەنىمىز نە؟ ەكونوميكانى ىرىقتاندىرۋ، مەملەكەتتىڭ ەكونوميكاعا قاتىسۋىن شەكتەۋ، كاسىپكەرلىكتى قولداۋ»، - دەدى ول.

تەلەۆيزيالىق پىكىرسايىس بارىسىندا بەرىك دۇيسەمبينوۆ Respublica پارتياسىنىڭ وكىلى سىرىمبەك تاۋدىڭ «اق جول» پارتياسى باسشىلىعىنىڭ ۇزاق جىلدان بەرى وزگەرمەۋىنە قاتىستى سۇراعىنا جاۋاپ بەرۋگە تىرىستى.

«ماسەلە باسشىنىڭ اۋىسقانىندا ەمەس. ءيا، دۇرىس تا شىعار. ءبىراق، بىزدە «كوپىردىڭ ۇستىندە ات اۋىستىرۋ» جوق»، - دەپ جاۋاپ بەردى اق جول پارتياسىنىڭ وكىلى.

ونىڭ پايىمىنشا، ىقپالدى پارلامەنت بولۋى ءۇشىن بيۋدجەتكە قاتىستى ماسەلەلەر زاڭ شىعارۋشى ورگاننىڭ الدىندا ەسەپتى بولۋى ءتيىس. سونىمەن قاتار سايلاۋدا پارتيا ۇكىمەتتى جاساقتاۋى قاجەت. ويتكەنى، وتكەن 30 جىلدىڭ ىشىندە ۇكىمەتتىڭ جەڭىسىنە دە، جەڭىلىسىنە دە ەشكىم جاۋاپ بەرگەن جوق. حالىق قارجىسى جەلگە ۇشتى.

پىكىرسايىستىڭ قورىتىندى بولىگىندە ءسوز العان بەرىك دۇيسەنبينوۆ سايلاۋشىلارعا ۇندەۋ جاسادى.

ەسكە سالا كەتەيىك، «Qazaqstan» ۇلتتىق ارناسىنىڭ تىكەلەي ەفيرىندە ءماجىلىس سايلاۋىنا قاتىساتىن 7 ساياسي پارتيا وكىلدەرىنىڭ اراسىندا وتكەن پىكىرسايىس اياقتالدى.

وعان «Amanat» پارتياسىنان ەلنۇر بەيسەنبايەۆ، «اۋىل» حالىقتىق دەموكراتيالىق پارتياسىنان جيگۋلي دايرابايەۆ، Respublica پارتياسىنان سىرىمبەك تاۋ، قازاقستان حالىق پارتياسىنان اسحات اسىلبەكوۆ، «بايتاق» جاسىلدار پارتياسىنان ازاماتحان امىرتايەۆ، «اق جول» دەموكراتيالىق پارتياسىنان بەرىك دۇيسەمبينوۆ، ال جالپىۇلتتىق سوتسيال-دەموكراتيالىق پارتياسىنان نۇرلان اۋەسبايەۆ قاتىستى.