قازاق حالقىنىڭ جۇرەگىنە جۇزدەن استام ۇلت وكىلى سىيىپ كەتەدى - ۇيعىر ەتنو- مادەني ورتالىعى
قازاقستان ۇيعىرلارىنىڭ رەسپۋبليكالىق ەتنومادەني ورتالىعى جوعارى كەڭەسىنىڭ ءتوراعاسى، «ۇيعىر اۆازي» قوعامدىق- ساياسي گازەتىنىڭ باس رەداكتورى ەرشات اسمەتوۆتىڭ پىكىرىنشە، العىس ايتۋ كۇنى ەڭ ماڭىزدى جانە قۇرمەتتى كۇن.
«ويتكەنى العىس جۇرەكتەن شىعادى. العىس ادامداردى جاقىنداستىرادى، تاتۋلاستىرادى. بۇل مەرەكەنىڭ جىل سايىن ۇلكەن مانگە يە بولىپ كەلە جاتقانىنا قۋانىشتىمىن»، - دەيدى ول.
سونداي- اق ول قازاق حالقىنىڭ جۇرەگىنە جۇزدەن استام ۇلت وكىلى سىيىپ كەتەتىنىن زور قۋانىشپەن اتاپ ءوتتى.
«شەتەلدەرگە جۇمىس بابىمەن بارعانىمىزدا ءبارى تاڭ قالىپ: «وسىنداي كوپ ۇلتتى مەملەكەتتە ادامدار قالاي تاتۋ- ءتاتتى ءومىر سۇرەدى؟» دەپ سۇرايدى. وعان سەبەپ - قازاق حالقىنىڭ، ونىڭ اينالاسىنداعى بارلىق ۇلتتار مەن ۇلىستاردىڭ جۇرەگىنىڭ تازالىعى دەپ بىلەمىن»، - دەيدى سپيكەر.
«جاستار اسسامبلەياسى» ر ق ۇ مۇشەسى، قازاقستان ۇيعىر جاستارى وداعىنىڭ ءتوراعاسى رۋستام قايرىيەۆ تا بارشا قازاقستاندىقتى العىس ايتۋعا شاقىردى.
«بۇل وتە ماڭىزدى، ايتۋلى مەرەكە. ناعىز تەكتىلىكتىڭ مەيرامى. العىس ايتا ءبىلۋ - شىن مانىندە ادامنىڭ قانشالىقتى اسىل، جىلى جۇرەكتى ادام ەكەنىن اڭعارتادى. بارلىعى ءۇشىن «راحمەت» ايتا ءبىلۋ كەرەك. سوندىقتان مەن، اسىرەسە، جاستاردى ۇيالماي، كوشەگە شىعىپ، كۇلىمسىرەپ، ءاربىر قازاقستاندىققا العىس ايتۋعا شاقىرامىن. بۇگىنگى بەيبىت اسپان استىندا ءومىر ءسۇرىپ جاتقانىمىزعا ءاربىر قازاقستاندىقتىڭ قاتىسى بار. ءاربىر قازاقستاندىق وسى تاتۋ وتباسىنىڭ مۇشەسى. قازاقستان حالقى اسسامبلەياسىنىڭ جانە بارشا قازاقستاندىقتاردىڭ اتىنان جاستارىمىزدى قۇتتىقتاپ، ولارعا تابىس، وركەندەۋ، ەلىمىزدىڭ ەكونوميكاسىنىڭ دامۋى جولىندا باسەكەگە قابىلەتتى بولۋىن تىلەيمىن»، - دەپ تۇيىندەدى ول ءسوزىن.
