ەلىمىزدە حيميالىق قاۋىپتى نىسانداردىڭ سانى ازايادى
«بۇگىندە رەسپۋبليكا بويىنشا ءبىزدىڭ ەسەپتە تۇرعان 142 حيميالىق قاۋىپتى نىسان بار. قازىر ولاردىڭ سانىن ازايتۋ بويىنشا كەشەندى شارا اتقارىلىپ جاتىر. باستىسى - حالىق قاۋىپسىزدىگى ءۇشىن حيميالىق قاۋىپتى نىسانداردى رەاگەنتتەرگە كوشىرۋ ماسەلەسى. قازاقستاندىقتار ءجيى قولداناتىن حيميالىق ۋلى زاتتار - حلور جانە اممياك. وتكەن جىلدىڭ قورىتىندىسى بويىنشا ەلىمىزدە ءۇش حيميالىق قاۋىپتى نىسان قاۋىپسىز رەاگەنتكە كوشىرىلدى. ەندى اتالعان نىساندار حيميالىق تۇرعىدان قاۋىپسىز»، - دەدى باۋىرجان سىزدىقوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، حيميالىق قاۋىپ تونگەن جاعدايدا حالىق ەۆاكۋاتسيالانۋى مۇمكىن.
«ەگەر حيميالىق نىساندا اپات بولىپ، دابىل قاعىلسا، حالىق ول ماڭنان كەتۋى كەرەك. حلور نە اممياك توگىلگەن جاعدايدا، ول جەردەن اۋلاق بولعان ءجون. تاعى ءبىر جايت، ۋلى زاتتارمەن جۇمىس ىستەيتىن جانە سول ماڭدا تۇراتىن حالىق ءۇشىن جەرگىلىكتى اتقارۋشى ورگاندار گازقاعار (پروتيۆوگاز) ساتىپ الادى»، - دەيدى ول.
اۆتور
داۋلەت ىزتىلەۋ
