جاپونيا رەسەي كومپانيالارى مەن شەنەۋنىكتەرىنە سالعان سانكسياسىن ۇلعايتا ءتۇستى
سانكسيانىڭ جاڭا تىزىمىندە رەسەي قورعانىس ءمينيسترىنىڭ ورىنباسارى ۆيكتور گورەمىكين مەن «كالاشنيكوۆ» كونسەرنىنىڭ پرەزيدەنتى الان لۋشنيكوۆ بار. رەسەي پرەزيدەنتىنىڭ مەملەكەتتىك كەڭەس جۇمىسىن قامتاماسىز ەتۋ جونىندەگى باسشىسى الەكساندر حاريچيەۆ پەن ونىڭ ورىنباسارى بوريس راپوپورت، شەشەنستان پرەزيدەنتى رامزان كادىروۆتىڭ تۋىسى تۋرپال- ءالي يبراگيموۆ جانە رەسەي قارۋلى كۇشتەرى باس شتابىنىڭ قىزمەتكەرلەرى دە تىزىمگە ىلىككەن.
جاپونيا ۇكىمەتى «ا ك بارس» حولدينگىنە، «سويۋز» قوسارلى تەحنولوگيالار فەدەراتسيالىق ورتالىعىنا، «روسەلەكترونيكا» حولدينگىنە جانە اسكەري- ونەركاسىپ كەشەنىنە قاتىسى بار زەرتتەۋ ورتالىقتارى مەن ينستيتۋتتارىنا دا شەكتەۋ ەنگىزگەن.
ۋكراينانىڭ رەسەي جاۋلاپ العان جەرىندەگى رەسەي وكىلدەرىنە بولەك سانكسيا ءتىزىمى جاسالعان.
25 -اقپاندا جاپونيا پرەمەر- ءمينيسترى فۋميو كيسيدا سانكسيانى ۇلعايتا تۇسەتىنىن مالىمدەگەن. اڭگىمە رەسەيدىڭ 120 زاڭدى جانە جەكە تۇلعاسىنىڭ اكتيۆتەرىن بۇعاتتاۋ تۋرالى بولعان. جاپونيا رەسەي اسكەري ونەركاسىبىن نىعايتاتىن تاۋارلاردى ەكسپورتاۋعا دا تىيىم سالادى. جاپونيانىڭ سانكسيا تىزىمىنە رەسەيدىڭ 900 جەكە تۇلعاسى مەن 450 زاڭدى تۇلعاسى كىرگەن.
2022 -جىلى رەسەي ۋكراينا جەرىنە جاپپاي شابۋىل باستاعان سوڭ، جاپونيا رەسەي پرەزيدەنتى ۆلاديمير پۋتيننەن باستاپ رەسەيدىڭ وزگە دە كوپتەگەن لاۋازىمدى تۇلعاسىنا سانكسيا سالعان.
رەسەي جاپونيانى «دوس ەمەس» ەلدەر ساناتىنا قوسىپ، وڭتۇستىك كۋريل ارالدارىنداعى شارۋاشىلىق جۇمىستارىن بىرلەسىپ رەتتەۋ تۋرالى ديالوگتى توقتاتاتىنىن مالىمدەگەن. رەسەي جاپون بالىقشىلارىنا وڭتۇستىك كۋريلدە بالىق اۋلاۋعا تىيىم سالعان. بۇل رەتتە 1998 -جىلى جاسالعان رەسەي- جاپونيا كەلىسىمىن العا تارتقان.
