اسەل، ايگەريم، مەدينا. ەسىم قويۋدا قازاقتىڭ ءتول دىبىستارىنان قاشۋ ءۇردىسى بار
قازاقستاندا 30 جىلدا بالالارعا ەڭ ءجيى قويىلعان ەسىمدەردىڭ يندەكسى تولىق جاڭارعان. بۇل تۋرالى استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ جازدى.
«تاۋەلسىزدىك جىلدارى قازاقستاندا ۇلتى قازاق بالالارعا قويىلعان ەسىمدەرگە تالداۋ جاساپ كوردىم. توقسانىنشى جىلدارى ۇل بالالاردىڭ توپ وندىعىندا ازامات، نۋرسۋلتان، باۋىرجان، دانيار، ەرلان، ولجاس، رۋسلان، ارمان، ەرجان، جاندوس اتتارى ورنالاسسا، سوڭعى 2022 -جىلى اليحان، ومار، الديار، ايسۇلتان، امير، نۇريسلام، الان، الي، الينۇر، ارسەن دەگەن اتتار كوش باستاعان. قىزدارعا 1991 -جىلى ايگەريم، ايدانا، دينارا، اينۋر، جانار، ايجان، اسەل، مادينا، سالتانات، ارايلىم ەسىمى ءجيى قويىلسا، بىلتىر مەدينا، ايلين، ايشا، اسىلىم، توميريس، ايالا، رايانا، سافيا، ايزەرە جانە ايىم اتتى بۇلدىرشىندەر دۇنيەگە كوپ كەلگەن ەكەن»، - دەپ جازدى ساكەن ەسىركەپ.
ونىڭ سوزىنشە، جىل ىشىندە بالالارعا ەڭ ءجيى قويىلعان ەسىمدەردىڭ يندەكسى تولىق جاڭارعان. سونىمەن قاتار، مامان قىزدارعا ەسىم قويۋدا ءا، ق، ءى، ءۇ، ۇ، ءو، ع سياقتى قازاقتىڭ ءتول دىبىسىنان قاشۋ ءۇردىسى بايقالاتىنىنا نازار اۋداردى.
«بۇل اينۋرا، نۋراي، اسەل، كاراگوز، گۋلسيم دەگەن سياقتى ۇلتتىڭ ءتول دىبىستارىن بۇرمالايتىن اتتاردىڭ كوبەيگەنىنە قاراعاندا جاقسى دا شىعار»، - دەيدى استانا قالاسىنىڭ تىلدەردى دامىتۋ جانە ارحيۆ ءىسى باسقارماسىنىڭ باسشىسى.
ساكەن ەسىركەپ، سونداي-اق ادام اتىنىڭ ءمان-مازمۇنى ءدىني سيپاتقا ويىسقانىن دا جازعان.
«بۇل ادامداردىڭ ءدىني كوزقاراسىنا بايلانىستى ما، الدە ەلىكتەۋشىلىكتەن بە؟ ول جاعى جەكە زەرتتەۋدى قاجەت ەتەدى»، - دەپ جازدى ول.
informburo.kz
