تۇندە كورۋگە بولمايتىن قازاقستاندىق قورقىنىشتى سەريال قالاي ءتۇسىرىلدى؟
سەريال كوپتەگەن كورەرمەننىڭ ويىنان شىققان. وعان سەريالعا قاتىستى جازىلعان پىكىرلەر دالەل بولا الادى. سونىمەن قاتار، كورەرمەندەر سەريالدىڭ قورقىنىشتى بولعانى سونشالىق، تۇندە كورۋگە بولمايتىنىن جازعان.
قازاقستانداعى العاشقى ميفولوگيالىق حوررور جانرىنداعى سەريال قالاي ءتۇسىرىلدى؟ اكتەرلەر قۇرامى قالاي تاڭدالدى؟ ءتۇسىرىلىم كەزىندە قانداي دا ءبىر تىلسىم كۇشتەر بولدى ما؟ بۇل تۋرالى Massaget.kz تىلشىسىنە كومپانيا وكىلدەرى سۇحبات بەردى.
كومپانيا وكىلدەرىنىڭ سوزىنشە، Salem social media حوررور جانرىنا ۇزاق ۋاقىت دايىندالعان.
«ءتورت جىل بويى ءارتۇرلى فورماتتاعى جوبالار، ۆەب-سەريالدار ءتۇسىرۋ ارقىلى قورقىنىشتى جانرعا دا كەلىپ جەتتىك. قازاقستاندا حوررور جانرىن قابىلدامايدى دەگەن بەلگىلى ءبىر ستەرەوتيپ دەپ بىلەمىز. سەبەبى ءدال قازىر «الاس» ۆەب-سەريالى جاڭا ارنادا جارتى ميلليوننان استام قارالىم جيناپ، كورەرمەندەردىڭ ىستىق ىقىلاسىنا بولەنۋدە. جاڭا ارناعا سالىنعاندىقتان بۇل ۇلكەن كورسەتكىش».
ءتۇسىرىلىم جۇمىستارى الماتى قالاسىنىڭ ماڭىندا وتكەن. ءتۇسىرىلىم بارىسىندا قيىندىقتار مەن قىزىقتار دا بولعان.
«ءتۇسىرىلىم ۇجىمى تاڭعى 5 تەن باستاپ، كۇن باتقانشا 15 كۇن بويى ۇزدىكسىز ءتۇسىردى. جۇمىس بارىسىندا ءتۇسىرىلىم الاڭىندا تۇسىنىكسىز تىلسىم كۇشتەردىڭ بارىن دا سەزدىك. ماسەلەن، گريم جاسايتىن قىزمەتكەر تاۋدا وتكەن ءتۇسىرىلىم كەزىندە ەلەستىڭ بەينەسىن بايقاعانىن ايتتى. ال ءۇيدىڭ ىشىندە ۇنەمى تەحنيكالار ىستەمەي قالا بەردى. كەيىنىرەك ءبىزدىڭ جوبامىزعا باقسىلىق جونىندە كەڭەس بەرگەن ەكسپەرتتەن سۇراستىرىپ كوردىك. ول بىزگە تىلسىم كۇشتەردىڭ بارىن ايتىپ، سول جەردى ۇنەمى تازالاپ وتىردى»، - دەيدى كومپانيا وكىلدەرى.
«الاس» ۆەب-سەريالىنىڭ سەناريى قازاق ميفولوگياسىنا نەگىزدەپ الىنعان.
«الەمگە ءوزىمىزدىڭ قازاق ميفولوگياسىنىڭ كەيىپكەرلەرىنىڭ ءبىرىن تانىتامىز. نەگىزى، تاريحىمىزدا بۇنداي كەيىپكەرلەر كوپ جانە ولار ءبىر-بىرىنەن ەرەكشەلەنەدى. ءبىز سونداي ءبىر كەيىپكەردى نەگىزگە الا وتىرىپ، ءار ءبولىم سايىن شارىقتاۋ شەگىنە جەتەتىندەي ەتىپ جازدىق. ازىرگە ءبىزدىڭ كەيىپكەردىڭ بەينەسى تولىعىمەن اشىلعان جوق. ءۇشىنشى بولىمنەن باستاپ كورەرمەن ءاربىر نارسەگە ءمان بەرىپ، كەيىپكەردىڭ كىم ەكەنىن تابا الادى. سونىمەن قاتار، Salem وزەكتى ماسەلەلەردى ءجيى كوتەرەدى، «الاس» ۆەب-سەريالىندا: انانىڭ بالاعا دەگەن ماحابباتى، وتباسى اراسىنداعى ماسەلەلەر، سۋرروگات انا جالداۋ تاقىرىپتارى بار».
View this post on Instagram
ال «الاس» ۆەب-سەريالىنىڭ رەجيسسەرى قايرات تەمىرعاليدىڭ سوزىنشە، سەريالدىڭ اكتەرلىك قۇرامىنا تاڭداۋ ۇزاق جاسالعان.
«Salem- ءنىڭ نەگىزگى ماقساتتارىنىڭ ءبىرى كورەرمەنگە ۇنەمى جاڭا بەينەنى تانىتۋ. وسى تاجىريبەگە ساي ءبىز نەگىزگى قۇرامدى كاسىبي تەاتر جانە كينو اكتەرلارىنىڭ ىشىنەن تاڭدادىق. ولار: ايگەرىم اققانات مۇستافا، ماقسات جاقىپ، رايحان ايتقوجانوۆا، جۇماتاي احمەتحان، مۇرات جارىلقاسىنوۆ. سونىمەن قاتار، باستى رولدە ويناعان الماگۇل قازيحان- ساعىندىقتى بىردەن بەكىتتىك. حوررور جانرىندا اكتەرلەرگە قويىلاتىن ماڭىزدى تالاپتار بار. سوندىقتان مەن رەجيسسەر رەتىندە اكتەرلەردى تاڭداۋ كەزىندە اسا ءمان بەرىپ قارادىم. مىسالى، باستى كەيىپكەر الماگۇل قازيحان-ساعىندىق قورقىنىشتى، الاڭداۋشىلىقتى جانە ۇمىتسىزدىكتى بەينەلەۋى ماڭىزدى بولدى. بۇل ەموتسيالاردى كورەرمەن سەزىنۋ ءۇشىن باستى تالاپ شىنايىلىقتى كورسەتۋىندە. قورقىنىشتى جانرداعى اكتەر ءۇشىن باستى شارت - ەموتسياعا كوپ جەكە كۇش سالىپ، كورەرمەنگە ۇرەي سىيلاۋ كەرەك. حوررور جانرىندا كادرداعى ءوزىن ۇستاۋ ءستيلى، وزىندىك قوزعالىس فيزيكاسى بار. سوندىقتان جانردا جۇمىس ىستەۋ ءۇشىن اكتەر جاڭا نارسەلەرمەن بەتپە- بەت كەلۋى كەرەك»، - دەيدى سەريال رەجيسسەرى قايرات تەمىرعالي.
سەريالدا باستى رولدەردىڭ بىرىندە ويناعان اكتريسا الماگۇل قازيحان- ساعىندىق بۇل ءرولدى ەشكىمگە بەرگىسى كەلمەگەنىن ايتادى.
«بۇل ءرولدى وتە قاتتى قالادىم. تاجىريبە رەتىندە كورگىم كەلدى. قيىن بولاتىنىن ءتۇسىندىم. سونىسىمەن قاتتى قىزىق بولدى. سوندىقتان باسقا جوبالاردان باس تارتىپ، وسى سەريالدىڭ ءتۇسىرىلىمىن كۇتتىم. حوررور جانرىندا بولعاندىقتان، كۇندىز تۇسىرسەك تە، تۇندە تۇسىرسەك تە، تاۋدا تۇسىرسەك تە اسا قورقىنىش بولعان جوق. جۇمىس رەتىندە قارادىم. ءتۇسىرىلىم پروتسەسىنەن ءلاززات الدىم. تاجىريبە جينادىم. حوررور جانرىندا بولعاندىقتان، تۇسپەي-اق قويامىن-اۋ دەگەن وي بولعان جوق»، - دەيدى اكتريسا.
