باۋىرساقتىڭ ادام ءومىرىن ۇزارتاتىنى راس پا؟

بۇل تاعام ادام ءومىرىن ۇزارتىپ، ىشەك جۇمىسىن جاقسارتادى ەكەن. نەگىزىندە عالىمدار مۇنداي جاڭالىق اشپاعان دەپ حابارلادى Stopfake.kz سايتى.

باۋىرساق - قازاقتىڭ ۇلتتىق تاعامى. بۇعان قاراماستان، باۋىرساق ادام ءومىرىن ۇزارتا المايدى، مۇنى دالەلدەيتىن عىلىمي زەرتتەۋلەر جوق.

ا ق ش ۇلتتىق مەديتسينا كىتاپحاناسىنىڭ سايتىندا Bayrsak ءسوزى مۇلدە جوق. سونداي-اق ءبالىش نەمەسە مايعا پىسكەن نان جەۋدىڭ سالدارىنا ارنالعان زەرتتەۋلەر دە جوق.

نەگىزىنەن، سۋ مەن ۇننان جاسالىپ، مايعا قۋىرىپ پىسىرىلەتىن تاعامدار نەمەسە دەسەرتتەر كەز كەلگەن مادەنيەتتە بار. بىرەۋلەر ونى تاتتىلەپ دايىنداسا، باسقالارى تۇز بەن دامدەۋىشتەر قوسادى. ءبىراق بارلىق جاعدايدا قامىردى مايعا قۋىرادى.

مايعا قۋىرىلعان قامىر - كومىرسۋلار كوزى. مۇنداي تاعامدى جەپ، ۇزاق ۋاقىت تويىپ جۇرەسىز.

الايدا قۋىرىلعان تاعامدى شامادان تىس جەۋ سالماق قوسۋعا جانە ەكىنشى تيپتەگى قانت ديابەتىنىڭ دامۋىنا اكەپ سوعۋى مۇمكىن. باۋىرساق - مايعا باي كالوريالىق ءونىم.

قورىتا ايتقاندا، باۋىرساقتىڭ ادام ءومىرىن ۇزارتاتىنى عىلىمي دالەلدەنبەگەن. ول دەنساۋلىققا زيان تيگىزبەيدى، ءبىراق شامادان تىس جەگەن كەزدە پروبلەما بولۋى مۇمكىن.