يزرايلدىك كومپانيا قازاقستانعا سۋ تۇشىتۋ جابدىعىن جەتكىزۋگە نيەتتى
قازاقستاننىڭ يزرايلدەگى ەلشىسى ساتىبالدى بۇرشاقوۆ سۋدى تازارتۋ جونىندەگى شەشىمدەر سالاسىنداعى الەمدىك كوشباسشىلاردىڭ ءبىرى بولىپ تابىلاتىن «IDE Technologies» يزرايلدىك كومپانياسىنا باردى. كەزدەسۋدە كومپانيانىڭ ۆيتسە- پرەزيدەنتى ميحاەل ترەمەر سۋ تۇشىتۋ قوندىرعىلارى مەن ونەركاسىپتىك سۋ تازارتۋ قۇرىلىستارىن جوبالاۋ، سالۋ جانە پايدالانۋ جونىندەگى مۇمكىندىكتەرىن تانىستىردى.
س. بۇرشاقوۆ تۇرعىنداردى ساپالى اۋىز سۋمەن قامتاماسىز ەتۋدىڭ وزەكتىلىگىن اتاپ ءوتىپ، وسى سالاداعى ىنتىماقتاستىقتىڭ ماڭىزدى الەۋەتىنە نازار اۋداردى. وسى ورايدا، قازاقستان پرەزيدەنتى قاسىم- جومارت توقايەۆ قازىرگى زامانعى تەحنولوگيالاردى ەنگىزە وتىرىپ، ماڭعىستاۋ وبلىسىنىڭ سۋ تۇشىتۋ كاسىپورىندارىن جاڭارتۋ جونىندەگى جوبالارعا ءتۇيىندى ءمان بەرەتىنىن ايتتى.
كەلىسسوزدەردىڭ جالعاسىندا ماڭعىستاۋ اتوم ەنەرگەتيكالىق كومبيناتى دەلەگاتسياسىنىڭ يزرايلگە ساپارى ۇيىمداستىرىلدى. جەرگىلىكتى كومپانيا باسشىلىعىمەن كەزدەسۋدە تاراپتار تەڭىز سۋىن تۇشىتۋ تەحنولوگيالارى سالاسىنداعى ىنتىماقتاستىقتى دامىتۋعا قىزىعۋشىلىق تانىتتى، سونداي- اق قوندىرعىلاردى پايدالانۋ بويىنشا تاجىريبە الماستى. قازاقستاندىق دەلەگاتسيا كەرى وسموس تەحنولوگياسى بويىنشا جۇمىس ىستەيتىن حادەرا قالاسىنداعى سۋ تۇشىتۋ كەشەنىنىڭ وندىرىسىمەن تانىستى.
«م ا ە ك» ج ش س باس ديرەكتورىنىڭ ورىنباسارى ا. ۇيكەكبايەۆ يزرايلدىك كومپانيادان بۇرىن ساتىپ الىنعان سۋ تۇشىتۋ قوندىرعىلارىن پايدالانۋدىڭ وڭ تاجىريبەسىن اتاپ ءوتتى. ءوز كەزەگىندە يزرايلدىك كومپانيا ماڭعىستاۋ وبلىسى اكىمدىگىنىڭ جوباسى بويىنشا حالىقتىڭ مۇقتاجدىقتارى ءۇشىن قۋاتتىلىعى تاۋلىگىنە 24 مىڭ تەكشە مەتر اۋىز سۋ تۇشىتۋ جابدىعىن جەتكىزۋدى ۇيىمداستىرۋعا نيەت ءبىلدىردى.
