الماتىدا «كۇلپەت» اتتى جاڭا روماننىڭ تۇساۋى كەسىلدى

الماتى. قازاقپارات - ۇلتتىق كىتاپحانادا Mecenat.kz ادەبي بايقاۋىنىڭ تۇڭعىش جەڭىمپازى، جازۋشى شارحان قازىعۇلدىڭ «كۇلپەت» رومانىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

سالتاناتتى شاراعا روماننىڭ اۆتورى، جازۋشى شارحان قازىعۇل، مەملەكەت جانە قوعام قايراتكەرى بەردىبەك ساپاربايەۆ، جازۋشى، قازاقستاننىڭ ەڭبەك سىڭىرگەن قايراتكەرى سماعۇل ەلۋباي، قازاقستاننىڭ حالىق ءارتىسى، ەكى مارتە مەملەكەتتىك سىيلىقتىڭ يەگەرى، اكتەر دوسحان جولجاقسىنوۆ، Mecenat.kz ادەبي بايقاۋىنىڭ قۇرىلتايشىسى ەرلان اسقاربەكوۆ، Kitapfest كىتاپ فەستيۆالىن ۇيىمداستىرۋشى بەكنۇر قيسىقوۆ، باسقا دا زيالى قاۋىم وكىلدەرى قاتىستى.

كىتاپتىڭ تۇساۋكەسەر شاراسى باستالماس بۇرىن زيالى قاۋىم وكىلدەرى رومان جايلى ويلارىن ايتتى.

العاشقى بولىپ مەملەكەت جانە قوعام قايراتكەرى بەردىبەك ساپاربايەۆ ءسوز الدى.

«روماننىڭ تاربيەلىك ءمانى بار. وندا قازىرگى اۋمالى-توكپەلى زاماندا ءوز ۇلتىن، ەلىن ءسۇيۋ، قانداي قيىن جاعداي بولماسىن، ادامي قاسيەتتى ساقتاپ قالۋ تاقىرىبى كورىنىس تاپقان. ءبىز قازىر وسى اسىل قاسيەتتەردى جاستاردىڭ بويىنا ءسىڭىرىپ، كوبىرەك ناسيحاتتاۋىمىز كەرەك. سوندا ەلىمىزدىڭ بولاشاعى جارقىن بولادى دەپ ويلايمىن. شارحان، سەن ءالى جاسسىڭ. سەنىڭ قولىڭنان مۇنداي تۋىندىلار ءالى كوپ شىعادى»، - دەدى بەردىبەك ساپاربايەۆ.

حالىق ءارتىسى دوسحان جولجاقسىنوۆ روماندى ەكران مەن ساحناعا شىعارۋ تۋرالى ءوز ويىن ايتتى.

«كۇلپەت» رومانى - شارحاننىڭ جان ازابى. مۇندا ءۇش بۋىننىڭ تاريحى جازىلعان. ولار ادامزاتتىق ماسەلەلەردى كوتەرەدى. جالپى، رومان كينو تۇسىرۋگە، ءتىپتى، ساحناداعى پەساعا سۇرانىپ تۇر. ەڭ عاجابى - كەيىپكەرلەردىڭ ءارقايسىندا سۇڭعىلا ويلارى مەن مىنەز- قۇلقى بار. ول ەكران مەن ساحناعا شىقسا، كەرەمەت دۇنيەگە كۋا بولامىز دەپ ويلايمىن. شارحان باۋىرىم، سەن وسىدان كەيىن ەشتەڭە جازباساڭ دا بولادى. سەن وسى رومانىڭمەن-اق تاريحتا قالدىڭ. Mecenat.kz بايقاۋىنىڭ جەڭىمپازى ماكەڭ، جاكەڭدەر ەمەس، تاپ وسى شارحاننىڭ بولۋى مەنى قاتتى قۋانتتى»، - دەدى دوسحان جولجاقسىنوۆ.

جازۋشى سماعۇل ەلۋباي مۇنداي شىعارمانى وقۋدىڭ ءوزى عانيبەت ەكەنىن ايتتى.

«مەن بۇل كىتاپتان بىرنەشە ەرەكشەلىكتى بايقادىم. ولار - زاماناۋي فورماتقا ساي كەلۋى، كولەمىنىڭ شاعىندىعى. قازاقتىڭ ءسوز ساپتاۋىن بۇزباي، باي تىلىمەن جازىلعان. ال مۇنداي شىعارمانى وقۋدىڭ ءوزى عانيبەت. سونىمەن بىرگە، شارحان روماندا ءوزىنىڭ قازىنالى ويلارىن اقتارعان. ال وسى شىعارمانى ەلەپ- ەسكەرىپ، وعان جۇلدە بەرىپ، ماتەريالدىق تۇرعىدا قولداۋ كورسەتكەن Mecenat.kz ۇيىمىنا قاتتى رازى بولدىم»، - دەيدى جازۋشى سماعۇل ەلۋباي.

كەلەسى كەزەكتە كىتاپ اۆتورى شارحان قازىعۇلعا ءسوز بەرىلدى. ول كىتاپتىڭ جازىلۋ تاريحى جايلى ويلارىن ايتتى.

«بۇل شىعارما ارقىلى مەن «ادام ومىرگە نە ءۇشىن كەلەدى؟»، «ادامنىڭ جانى ماڭگىلىك پە؟»، «ادامنىڭ ومىرگە كەلگەندەگى ماقساتى نە؟» دەگەن سۇراقتارعا جاۋاپ ىزدەپ، وسى سۇراقتارعا جاۋاپتى كەيىپكەرلەردىڭ سوزىمەن كوركەم تىلدە جەتكىزگىم كەلدى. رومان ىشىندە بۇگىنگى جاھاندانۋ داۋىرىندە قازاق ۇلتىنىڭ يدەنتيفيكاتسياسىن، الەمدە ءوزىنىڭ لايىقتى ورنىن ساقتاپ قالۋ، اقىلدى، ءبىلىمدى ازاماتتاردىڭ تۋعان جەردەن جىراققا كەتپەي، ەڭبەك ەتۋىنە جاعداي جاساۋ، جاستاردىڭ پاتريوتتىق سەزىمىن وياتۋ تۋرالى ويلارىم ايتىلدى. جالپى، بۇل رومان كوپ ادامنىڭ قولقا سالۋىمەن دۇنيەگە كەلگەنىن ايتۋ كەرەك. بۇگىن كىتابىمنىڭ تۇساۋكەسەرىنە كەلگەن بارشاڭىزعا العىسىم شەكسىز»، - دەدى شارحان قازىعۇل.

وسىدان سوڭ مەملەكەت جانە قوعام قايراتكەرى بەردىبەك ساپاربايەۆ، جازۋشى سماعۇل ەلۋباي، قازاقستاننىڭ حالىق ءارتىسى دوسحان جولجاقسىنوۆ جاڭا كىتاپتىڭ تۇساۋىن كەستى.

شارا بارىسىندا قازاقتىڭ ءداستۇرلى ءانشىسى ايگۇل قوسانوۆا دومبىرامەن «اق سۇڭقار» حالىق ءانىن ورىندادى.

كەلەسى كەزەكتە Mecenat.kz ادەبي بايقاۋىنىڭ قۇرىلتايشىسى ەرلان اسقاربەكوۆ ءسوز الىپ، ادەبي بايقاۋدىڭ ماقساتىن ءتۇسىندىردى.

«Mecenat.kz ادەبي بايقاۋىنىڭ ماقساتى - قازاقستاندىق كوركەم ادەبيەتتى جانە ونى وقۋعا دەگەن ىنتانى دامىتۋ، ەل جازۋشىلارىنىڭ دەڭگەيىن كوتەرۋ جانە ولاردى الەمدىك كىتاپ نارىعىنا شىعارۋ. ادەبي بايقاۋدىڭ العاشقى كەزەڭى وتە ءساتتى ءوتتى. وعان مىنا ستاتيستيكالىق مالىمەتتەر دالەل: تىركەلگەن اۆتور سانى – 137، سايتقا كىرگەن ادام سانى - 62 مىڭ، داۋىس بەرگەندەر – 6756، جۇكتەلگەن رومان – 67، حالىقتىق داۋىس بەرۋگە وتكەن رومان سانى - 21 بولدى. قازىر ۇزدىك رومان ءۇشىن جىل سايىن بەرىلەتىن Mecenat.kz ادەبي سىيلىعىنىڭ ەكىنشى كەزەڭى باستالدى. وسى ۋاقىتتان باستاپ شەتەلدەگى قانداستارىمىزدان دا قولجازبا قابىلدانادى. ورىس تىلىندەگى قولجازبالار تەك قازاقستان ازاماتتارىنان قابىلدانادى. بارلىق تالاپتار www.mecenat.kz سايتىندا تۇر»، - دەدى ەرلان اسقاربەكوۆ.

ول سونداي-اق ق ر اقپارات جانە قوعامدىق دامۋ مينيسترلىگى، «وتانداستار» قورى قولداۋ بىلدىرگەنىن، «Qazaqstan» ر ت ر ك، «حابار» تەلەارناسى جانە «Qazaqparat» حالىقارالىق اقپاراتتىق اگەنتتىگى اقپاراتتىق سەرىكتەستەر بولعانىن اتاپ ءوتتى.

ايتا كەتەيىك، بۇگىنگى كۇنى جازۋشى شارحان قازىعۇلدىڭ «كۇلپەت» رومانى الماتى قالاسى، روزىباكيەۆ كوشەسىندە ورنالاسقان «مەگا» ساۋدا ورتالىعىنداعى «مەلومان» كىتاپ دۇكەنىندە ساتىلىپ جاتىر. باعاسى - 2450 تەڭگە.