جاستار اراسىندا «تاريحىڭدى تانى» جوباسىن ۇيىمداستىرۋ كەرەك - باس ءمۇفتي
«راسىندا، وسكەلەڭ ۇرپاقتىڭ تاريحي ساناسىنا سىلكىنىس جاساۋدا ۇلىتاۋدىڭ ورنى ەرەكشە. كوپشىلىك قاۋىم بۇل جەرگە جوشى حان، الاشا حان، دومباۋىل كەسەنەلەرىن، حان ورداسى مەن اۋليەتاۋداي كيەلى ورىنداردى كورۋ ءۇشىن ارنايى كەلەدى. تۇركيا ەلىندە وقۋشىلاردىڭ جازعى دەمالىسىندا جۇزەگە اساتىن كەرەمەت جوبا بار. مەكتەپ مۇعالىمدەرى جاز بويى مەكتەپ وقۋشىلارىنىڭ تۇركيانىڭ تاريحي ورىندارىنا ارنايى ساياحاتىن ۇيىمداستىرادى»، - دەدى ول.
باس مۇفتيدىڭ اتاپ وتۋىنشە، مۇنداي ساياسات بارىسىندا تاريحشىلار ءوز ەلىنىڭ ارعى-بەرگى تاريحىن جاستارعا تاپتىشتەپ ءتۇسىندىرىپ، جەتەسىنە جەتكىزەدى.
«ءبىز وسى تاجىريبەنى الىپ، ءوز ەلىمىزدە جاستار اراسىندا «تاريحىڭدى تانى» جوباسى اياسىندا تاريحي تانىمدىق ساپار ۇيىمداستىرۋدى ۇسىنار ەدىم. كوپ ەستىگەننەن ءبىر كورگەن ارتىق دەمەي مە؟ ! بۇل جوبا جاس بۋىن وكىلدەرىنىڭ ءبىلىم كوكجيەگىن كەڭەيتىپ قانا قويماي، ولاردىڭ بويىنا ۇلتجاندىلىق، وتانشىلدىق سەزىمدەردى ۇيالاتۋعا ىقپال ەتەر ەدى»، - دەدى ناۋرىزباي تاعان ۇلى.
قازاقستان مۇسىلماندارى ءدىني باسقارماسىنىڭ مالىمەتىنشە، جەزقازعان قالاسىندا «ۇلىتاۋ وبلىسىنىڭ رۋحاني دامۋى» تاقىرىبىندا وتكەن رەسپۋبليكالىق عىلىمي-تاجىريبەلىك كونفەرەنسيادا زيالى قاۋىم وكىلدەرى ىزگى قوعام قۇرۋعا قاجەتتى العىشارتتار جايلى ويلارىمەن بولىسكەن.
