قۇتقارۋ جاساعىنىڭ جەتەكشىسى الماتىلىقتارعا ءزىلزالا كەزىندە نە ىستەۋ كەرەكتىگىن ايتتى
«تۇرعىندارعا مىنانى ۇسىنار ەدىم: ەگەر جەر سىلكىنىسى بولسا، نەگىزگى ىشكى قابىرعانىڭ جانىنا، نەگىزگى قابىرعانىڭ بۇرىشىنا، ەسىكتىڭ جاقتاۋىنا نەمەسە نەگىزگى تىرەۋىشتىڭ جانىنا تۇرۋ كەرەك. ليفت پايدالانۋعا تىيىم سالىنادى. سونداي- اق، جۋىنۋ بولمەسىندەگى ۆاننا جاقسى قۇتقارادى، اسىرەسە شويىن ۆاننالارى»، - دەدى سپيكەر وڭىرلىك كوممۋنيكاتسيالار قىزمەتىندە وتكەن بريفينگتە.
رەسپۋبليكالىق جەدەل- قۇتقارۋ جاساعىنىڭ باسشىسى سەيسميكالىق اۋداندا تۇراتىن ادامداردىڭ ساقتىق شارالارىن ءبىلۋى جانە «دابىل سومكەسىنىڭ» بولۋى كەرەكتىگىن اتاپ ءوتتى.
«قۇجاتتار، فونار، جىلى كيىم، اۋىز سۋ، تەز بۇزىلمايتىن ازىق- تۇلىك، العاشقى مەديتسينالىق كومەك كورسەتۋ قوبديشاسى بولۋى كەرەك»، - دەدى ول.
ۆلاديمير سوي چەمودانعا ىسقىرىق سالىپ قويۋعا كەڭەس بەردى.
«ادام ءۇيىندى استىندا قالعاندا، ول بىرنەشە كۇن ايعايلايدى، كومەككە شاقىرادى. ءبىراق ءبىر- ەكى كۇننەن كەيىن ونىڭ كۇشى تاۋسىلادى. قۇتقارۋشىلار ولاردى تەز تاۋىپ الۋى ءۇشىن ىسقىرىق قاجەت. تۇركيادا ادامداردى قۇتقارعان كەزدە بىزدە ارنايى قۇرىلعىلار بولدى. ءيتىمىز قيراعان اۋماقتا ءالى ءتىرى ادامدار بار ەكەنىن كورسەتكەندە ۇيىندىلەردى بۇزىپ وتە باستادىق، قۇرىلعىمەن ىزدەۋ جۇرگىزىلدى. وسى قۇرىلعىلاردىڭ كومەگىمەن ادامداردىڭ تىنىس الۋىن، جۇرەكتەرى قالاي سوققانىن ەستىدىك. سوندىقتان ىسقىرىقتىڭ دا ماڭىزى زور»، - دەدى سپيكەر.
