قاراعاندىلىق پوليتسەيلەر قىزمەتتىك كولىكتە ايەلدى بوساندىرىپ الدى
23- اقپان كۇنى قاراعاندى قالالىق پوليتسيا باسقارماسى پاترۋلدىك پوليتسيا پولكىنىڭ قىزمەتكەرلەرى مەدەت تولەگەنوۆ پەن بەرىك كەڭەسوۆ جاڭا-مايقۇدىق اۋماعىندا قوعامدىق قاۋىپسىزدىكتى قاداعالاۋ بويىنشا كەزەكشىلىكتە بولعان. ءتۇن جارىمىندا ولارعا جەدەل باسقارۋ ورتالىعىنان سول اۋماقتا ورنالاسقان شاعىن اۋدانداعى كوپقاباتتى ۇيلەردىڭ بىرىندە وتباسىلىق جانجال بولىپ جاتقانى تۋرالى حابارلاما ءتۇستى. مەكەنجايعا كەلگەن پوليتسەيلەر ايەل ادامدى كورگەن. ول جولداسىمەن ۇرىسىپ قالعانىن، كەيىن تاتۋلاسىپ، ءبىر-بىرىنە ەشقانداي وكپە-نازى جوق ەكەنىن ايتقان.
«ارىپتەس ەكەۋىمىز سول مەكەنجايدا تۇرعانىمىزدا بىزگە ءبىر ازامات تاياندى. ول ايەلىنىڭ تولعاعى قىسىپ جاتقانىن جانە ولاردى تەز ارادا پەرزەنتحاناعا اپارۋىن ءوتىندى. تولعاعى باستالعاندا سۋى كەتكەنىن، انە-مىنە بوساناتىنىن بىلدىك. جەدەل جاردەم شاقىرعانىمىزبەن ونىڭ قاي ۋاقىتتا كەلەتىنى بەلگىسىز بولدى. سوندىقتان جۇكتى ايەلدى قىزمەتتىك كولىكتىڭ الدىنا، ال جولداسىن ارتىنا وتىرعىزىپ، بىردەن پەرزەنتحاناعا باعىت الدىق. بىرنەشە ءجۇز مەتردەن سوڭ ايەل كولىكتى توقتاتۋىن جانە تولعاقتىڭ باستالىپ كەتكەنىن ايتتى»، - دەيدى مەدەت تولەگەنوۆ.
Polisia.kz مالىمەتىنشە، ءتارتىپ ساقشىلارى ابدىراپ قالماي، بوسانعالى جاتقان كەلىنشەككە مەديتسينالىق كومەك كورسەتكەن. ارادا بىرنەشە مينۋت وتكەندە قىزمەتتىك كولىكتە امان-ەسەن ومىرگە ءسابي كەلدى. پوليتسيا قىزمەتكەرلەرى انا مەن شاقالاق قىزدى پەرزەنتحاناعا جەتكىزىپ، دارىگەرلەر قاراۋىنا تاپسىردى.
پەرزەنتحانانىڭ Instagram-پاراقشاسىندا جازىلعانداي، پوليتسەيلەر پەرزەنتحاناعا جىلدام ءارى ۋاقىتىلى جەتكەن. كەرى جاعدايدا انا مەن بالا ومىرىنە قاۋىپ تونەر ەدى.
