19:59, 24 - اقپان 2023 | GMT +5
بوكس فەدەراتسياسى قامشىبەك قوڭقابايەۆتىڭ ستراندجا تۋرنيرىندە رينگكە نەگە شىقپاعانىن ءتۇسىندىردى
استانا. قازاقپارات - قازاقستان بوكس فەدەراتسياسى قامشىبەك قوڭقابايەۆتىڭ بولگاريا استاناسى سوفيا قالاسىندا ءوتىپ جاتقان «ستراندجا» تۋرنيرىندە 1/8 فينالدا وزبەكستاندىق باحوديروم جالولوۆپەن كەزدەسۋگە نەگە شىقپاعانىن ءتۇسىندىردى، دەپ حابارلايدى قازاقپارات ءتىلشىسى.
قازاقستان بوكس فەدەراتسياسىنان ءمالىم ەتكەنىندەي، قامشىبەك قوڭقابايەۆ قولىنداعى جاراقاتىنا بايلانىستى رينگكە شىقپادى.
«سونىمەن قاتار، جاتتىقتىرۋشىلار شتابىنىڭ ايتۋىنشا، اۋىر سالماقتاعى سپورتشىمىزدىڭ جاتتىعۋ مەن جارىس پروتسەسىنە تولىق قاتىسۋعا ۋاقىتى تىم از بولدى. الدا ماڭىزدى جارىستار - تاشكەنتتە وتەتىن الەم چەمپيوناتى مەن حانچجوۋداعى ازيا ويىندارى كۇتىپ تۇرعاندىقتان، قامشىبەك قالپىنا كەلىپ، ەڭ الدىمەن دەنساۋلىعىن ويلاۋى قاجەت»، دەلىنگەن ارنايى مالىمدەمەدە.
ەسكە سالا كەتەيىك، بۇدان بۇرىن بوكستان «ستراندجا» كۋبوگىندە ورازبەك اسىلقۇلوۆتىڭ ¼ فينالعا شىققانىن جازعان بولاتىنبىز.
سونداي-اق بەكزات نۇرداۋلەتوۆ كەلەسى كەزەڭگە ءوتتى.
