ۇلتتىق بانك باسشىسى كرەديت الاتىندارعا كەڭەس بەردى

استانا قازاقپارات - ۇلتتىق بانك ءتوراعاسى عالىمجان ءپىرماتوۆ حالىققا جاڭا نەسيە الار كەزدە مۇقيات ويلانۋعا كەڭەس بەردى، دەپ حابارلايدى قازاقپارات ءتىلشىسى.

بازالىق مولشەرلەمەنىڭ كولەمىنە ارنالعان بريفينگىدە ۇلتتىق بانك ءتوراعاسىنا نەسيەلەردىڭ پايىزى ءوسىپ جاتقانى تۋرالى سۇراق قويىلدى.

عالىمجان ءپىرماتوۆ ءبىزدىڭ ەكونوميكانىڭ جاعدايىندا بۇل زاڭدىلىق ۇنەمى ورىندالا بەرمەيتىنىن ەسكە سالدى.

«بازالىق مولشەرلەمە تۋرالى شەشىم قابىلداعان كەزدە ءبىز بۇكىل دەرەكتەر مەن تاۋەكەلدەردى تىڭعىلىقتى ساراپتايمىز. ارينە، ءبىز بازالىق مولشەرلەمەنى كوتەرۋ نەسيەنىڭ پايىزدىق مولشەرلەمەلەرىن كوتەرىپ كەتەتىنىن تۇسىنەمىز. ءبىراق ءبىزدىڭ جاعدايدا، ءبىزدىڭ ەكونوميكانى ەسكەرسەك، مۇنداي ىقتيمالدىق كەيدە سايكەسپەي جاتادى. بىرىنشىدەن، نەسيە بەرۋ دەرەكتەرىنەن كرەديتكە دەگەن سۇرانىس بار ەكەنىن كورىپ وتىرمىز. ءبىز كەلىپ تۇسكەن دەرەكتەردەن تۇتىنۋ نەسيەلەرى دە ءوسىپ جاتقانىن كورىپ وتىرمىز. ەكىنشى دەڭگەيدەگى بانكتەر ءتۇرلى سيپاتتاعى اتسيالار وتكىزىپ جاتىر. پايىزدىق مولشەرلەمەسى 0 پايىز، ءبولىپ تولەۋگە بولاتىن باعدارلامالار وتە تانىمال بولىپ الدى. سوندىقتان بىلتىر دا، بيىل دا ءبىزدىڭ شەشىمدەر نەسيەلەردىڭ پايىزدىق مولشەرلەمەسىن كوتەرىلىپ كەتپەگەنىن كورىپ وتىرمىز»، - دەدى ول.

ونىڭ مالىمەتىنە قاراعاندا، شاعىن جانە ورتا بيزنەسكە نەسيە بەرۋ كولەمى دە ارتىپ كەلەدى.

«حالىق بۇرىن الىپ قويعان نەسيەلەردىڭ پايىزدىق مولشەرلەمەسى بازالىق مولشەرلەمە كوتەرىلگەن كەزدە كوتەرىلمەيدى. بۇرىنعى نەسيەنى جاۋىپ، جاڭاسىن السا، سول كەزدە عانا كوتەرىلگەن پايىزدىق مولشەرلەمەمەن نەسيە راسىمدەيدى. سوندىقتان مەن نەسيە الۋ دەگەن وتە جاۋاپتى ءىس بولعاندىقتان وتە ۇقىپپەن قاراپ، ءوز مۇمكىندىكتەرىڭىزدى تارازىلاپ بارىپ شەشىم قابىلداۋعا كەڭەس بەرەر ەدىم. ازىرگە ءبىز بازالىق مولشەرلەمەنى ايتارلىقتاي جوعارى كوتەرگەنىمىزگە قاراماستان، نەسيەلەردىڭ پايىزدىق مولشەرلەمەسى سول دەڭگەيدە ءوسىپ جاتپاعانىن كورىپ وتىرمىز»، - دەدى عالىمجان ءپىرماتوۆ.

ايتا كەتەيىك، ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى %16,75 دەڭگەيىندە قالدىرۋ تۋرالى شەشىم قابىلدادى.