الماتى اكىمى باراحولكا بازارى بويىنداعى رەتسىز اۆتوتۇراقتاردى جويۋدى تاپسىردى

الماتى. قازاقپارات - الماتى قالاسىنىڭ تۇرعىنى قالا اكىمىنە «باراحولكا» ماڭىنداعى رەتسىز اۆتوتۇراقتار سالدارىنان كولىك كەپتەلىسى كوپ بولاتىنىن ايتىپ، شاعىمداندى، دەپ حابارلايدى قازاقپارات ءتىلشىسى.

«سولتۇستىك اينالما جولدىڭ بويىندا جۇمابايەۆ كوشەسىنەن كوكمايسا ىقشاماۋدانىنا دەيىن ءتورت بازار ورنالاسقان: «كەنجەحان»، «قازىنا»، «ارلان» جانە «الاش». بىلتىر بۇل تاسجولعا جوندەۋ جۇمىستارى جۇرگىزىلىپ، بورديۋرلەر ورناتىلدى. ءبىراق قازىر جۇرگىزۋشىلەر ءبىرىنشى جولاقتان تۇراق جاساپ العان: 200 تەڭگە ۇنەمدەيدى، بازاردىڭ تۇراعىنا كىرمەيدى. وسىعان بايلانىستى بۇل كوشەدە ۇنەمى كەپتەلىستەر بولادى»، - دەدى اۋدان تۇرعىنى.

قالالىق موبيلدىلىك باسقارماسىنىڭ باسشىسى ساعىندىك تەلىبايەۆ تىيىم سالۋ بەلگىلەرىنە قاراماستان، تاكسي جۇرگىزۋشىلەرى ءبىرىنشى جولاققا توقتاپ، جول ەرەجەسىن بۇزىپ جاتقانىن ايتتى.

ەربولات دوسايەۆ سيفرلاندىرۋ باسقارماسىنىڭ باسشىسىنا «سەرگەك» كامەرالارىن ورناتۋدى تاپسىردى.

«اتالعان اۋماققا ءبىر «سەرگەك» كامەرا كەشەنىن ورناتۋ كەرەك. تاكسي جۇرگىزۋشىلەرى ول جەردە اۆتوتۇراق جاساپ السا، ەندى ازداعان ايىپپۇل تولەسىن. اقشا بار دەپ ويلايمىن، الداعى ەكى ايدا كامەرالار ورناتامىز»، - دەدى قالا اكىمى.

سونداي- اق ول قالالىق پوليتسيا دەپارتامەنتىنىڭ باسشىسىنا ءتارتىپ بۇزۋشىلارعا شارا قولدانۋدى جانە اتالعان اۋماقتاردا پاترۋلدەۋ جۇمىستارىن جۇرگىزۋدى تاپسىردى.

«ەرتەڭنەن باستاپ بەلگىلەنگەن اۋماقتا تاڭەرتەڭ جانە كەشكە ۋاقىتتا پاترۋل كولىگىن قويسىڭ. «سەرگەك» كامەرالارىن ورناتقانشا»، - دەيدى ەربولات دوسايەۆ.

اۆتور

الما مۇقانوۆا