ادامدار وتتى قاي كەزدەن بەرى پايدالانا باستاعان؟

استانا. قازاقپارات - عالىمدار ادامدار وتتى قاي كەزدەن بەرى پايدالانا باستاعانى جايلى وسى كۇنگە دەيىن داۋلاسۋدا.

بوستون ۋنيۆەرسيتەتىنىڭ (ا ق ش) فرانچەسكو بەرنا باستاعان ارحەولوگتار توبى وعان 1 ميلليون جىلعا تاياۋ ۋاقىت وتكەن، دەپ پايىمدايدى.

عالىمدار وڭتۇستىك افريكا رەسپۋبليكاسى اۋماعىنداعى ۆوندەرۆەرك ۇڭگىرىندەگى وشاق ىزدەرىن تاۋىپ، وسىنداي قورىتىندىعا كەلدى، دەپ حابارلادى يتار- ت ا س س.

زەرتتەۋشىلەردىڭ ايتۋىنشا، ولار تاپقان كۇل مەن سۇيەكتەردىڭ قالدىقتارى ەجەلگى ادامدار وسى جەردە ءجيى وت تۇتاتقانىنا دالەل بولا الادى. كۇل ۇڭگىردىڭ اۋزىنان ەمەس، تۇپكىر جاعىنان تابىلعان، ياعني، بۇل وتتىڭ ماسەلەن، اعاشقا جاسىن ءتۇسۋ سياقتى تابيعي تۇتانعانىنان ەمەس، قولدان جاعىلعانىن بايقاتادى.

ۇڭگىردەگى تاستان جاسالعان قۇرالدار بويىنشا، عالىمدار وندا شامامەن 2 ميلليون جىل بۇرىن پايدا بولعان كادىمگى ەكى اياعىمەن تىك جۇرەتىن ادام /Homo Erectus/ وت جاققانىن انىقتادى.

زەرتتەۋشىلەر ادامدار وتتى نەگە جاققانىن ءدال انىقتاۋ مۇمكىن ەمەس ەكەنىن ايتادى، ءبىراق تا تاماق دايىنداۋعا قولدانىلعان بولۋى مۇمكىن دەپ پايىمدايدى. العاشقى قاۋىمدىق كەزەڭدە ادامدار ەتتى شيكىلەي جەۋى، ال سۇيەكتەردى سۋىقتان جانە جىرتقىش اڭداردان قورعانۋ ءۇشىن وتقا لاقتىرۋى مۇمكىن.

بۇل ولجا ادامنىڭ وتتى 1 ميلليون جىلعا جۋىق ۋاقىت بۇرىن پايدالانعانىن دالەلدەيتىن ءبىر عانا دالەل ەمەس. بۇدان بۇرىن زەرتتەۋشىلەر ۆوندەرۆەركتىڭ ماڭىنداعى سۆارتكرانس ۇڭگىرىنەن دە سول كەزەڭگە جاتاتىن كۇيگەن سۇيەكتەردى تاپقان بولاتىن. الايدا كەيبىر عالىمدار وت جاعۋدى ادامدار بۇدان دا ەرتەرەك - 1,5 ميلليون بۇرىن جىل بۇرىن ۇيرەنگەن دەگەن پىكىرلەر ايتىپ ءجۇر.

زەرتتەۋلەر ناتيجەسى ا ق ش ۇلتتىق عىلىم اكادەمياسىنىڭ جۋرنالىندا جاريالاندى.