كەمبريدج عالىمدارى ءتورت كۇندىك جۇمىس اپتاسى دەنساۋلىققا قالاي اسەر ەتەتىنىن انىقتادى

استانا. قازاقپارات - ءتورت كۇندىك جۇمىس اپتاسى الەمدە تاجىريبەدەن ءوتىپ جاتىر. قازاقستاندا الداعى ۋاقىتتا ءتورت كۇندىك جۇمىس اپتاسى ەنگىزىلۋى مۇمكىن ەكەنى حابارلانعان.

قازاقستاندىقتار 4 كۇندىك جۇمىس اپتاسىنا اۋىسقاندا 10 ساعات جۇمىس ىستەيدى. بۇل تۋرالى ق ر ەڭبەك مينيسترلىگى ەڭبەك جانە الەۋمەتتىك ارىپتەستىك دەپارتامەنتىنىڭ باسشىسى شالقار ورازبەكوۆ ايتقان بولاتىن.

ءبىراق مۇنداي جاڭاشىلدىقتىڭ نە اكەلەتىنىن عالىمدار قازىردىڭ وزىندە بىلەدى.

كەمبريدج ۋنيۆەرسيتەتى ەكسپەريمەنتتىڭ قورىتىندىسىن شىعاردى، ونىڭ بارىسىندا الەۋمەتتانۋشىلار ءتورت كۇندىك جۇمىس اپتاسى ادامعا قالاي اسەر ەتەتىنىن انىقتادى.

2022 -جىلدىڭ ماۋسىم ايىنان باستاپ جۇرگىزىلگەن زەرتتەۋگە شتاتتا 3 مىڭ قىزمەتكەرى بار بريتاندىق كومپانيالار قاتىستى. ولاردىڭ قاتارىندا ينتەرنەت-دۇكەندەر، كونسالتينگتىك فيرمالار، ساۋدا كومپانيالارى، IT، كوسمەتولوگيا، ماركەتينگ جانە دەنساۋلىق ساقتاۋ جانە ت. ب. بولعان. بۇل كاسىپورىنداردا جۇمىس اپتاسى 32 ساعاتقا قىسقارعان.

بۇكىل ەكسپەريمەنت بارىسىندا عالىمدار كومپانيا قىزمەتكەرلەرىنە كۇندەلىكتى ساۋالناما جۇرگىزدى. ولار قوسىمشا بوس ۋاقىتتىڭ، اتاپ ايتقاندا، ۋايىم مەن شارشاۋ دەڭگەيىنە قالاي اسەر ەتەتىنىن قاراستىردى.

الەۋمەتتىك ەكسپەريمەنت

زەرتتەۋ اۆتورلارى جاريالاعان ناتيجەلەر ءتورت كۇندىك جۇمىس اپتاسى قىزمەتكەرلەر اراسىندا سترەسس پەن اۋرۋ دەڭگەيىن ايتارلىقتاي تومەندەتەتىنىن كورسەتەدى.

كەمبريدج ۋنيۆەرسيتەتىنىڭ ءبىر باسىلىمىندا:

«جۇمىسشىلاردىڭ %71 عا جۋىعى شارشاۋ دەڭگەيىنىڭ تومەندەگەنىن ايتتى، ال %39 ى تاجىريبەدەن بۇرىنعىعا قاراعاندا از كۇيزەلىسكە تۇسكەنىن ايتتى»، - دەلىنگەن.

كوپتەگەن قاتىسۋشى وتباسىلىق مىندەتتەر مەن جۇمىستى ۇشتاستىرۋ وڭايىراق ەكەنىن، سونىمەن قاتار قوعامدىق پايدالى ىستەرگە دە ۋاقىتتارى بار ەكەنىن ايتقان.

عالىمدار سونداي-اق ءتورت كۇندىك جۇمىس اپتاسى اۋرۋ دەمالىسىنىڭ %65 عا قىسقارۋىنا، ال ادامدار ءبىر جىل بۇرىنعى كەزەڭمەن سالىستىرعاندا جۇمىستان شىعۋ تۋرالى شەشىم قابىلداۋ ىقتيمالدىعى %57 عا ازايتقان.

«سونىمەن بىرگە، ءتورت كۇندىك جۇمىس اپتاسىنا اۋىسقان كومپانيالاردىڭ كىرىستەرى وسى سىناق كەزەڭىندە دەرلىك وزگەرىسسىز قالدى، ءتىپتى ازداپ وسكەن، اتاپ ايتقاندا ورتاشا ەسەپپەن %1,4 عا»، - دەيدى زەرتتەۋشىلەر.

ەكسپەريمەنت باستالعانعا دەيىن كومپانيا باسشىلارى بەس كۇندىك جۇمىستان ءتورت كۇندىك جۇمىسقا كوشۋ قىزمەتكەرلەردىڭ ونىمدىلىگىن تومەندەتەدى دەپ قورىقتى. ءبىراق ناتيجەسى كەرىسىنشە شىققان.

كەمبريدج ۋنيۆەرسيتەتىندە زەرتتەۋ جۇرگىزگەن الەۋمەتتانۋشى برەندان بەرچەلل تاجىريبە بارىسىن سيپاتتادى.

«توپ- مەنەدجەرلەر جۇمىس ۋاقىتىنىڭ قىسقارۋىنىڭ ورنىن تولتىراتىن ونىمدىلىكتىڭ جوعارىلاۋىن كورەتىنىنە سەنىمدى ەمەس ەدى، ءبىراق ءدال سولاي بولدى. كوپتەگەن قىزمەتكەر ءوز جۇمىسىنىڭ تيىمدىلىگىن ارتتىرۋعا قىزىعۋشىلىق تانىتتى»، - دەيدى ول.

ناتيجەسىندە ەكسپەريمەنتكە قاتىسقان كومپانيالاردىڭ %92 ى ونى جالعاستىرۋعا شەشىم قابىلدادى، ال 14 فيرما جۇمىسكەرلەرگە ارنالعان ءتورت كۇندىك مەرزىم تۇراقتى قالاتىنىن مالىمدەگەن.

ازىرگە الەمنىڭ ەشبىر ەلىندە رەسمي ءتورت كۇندىك جۇمىس اپتاسى جوق. ەكسپەريمەنت يتاليا مەن جاپونيا سياقتى الەمنىڭ ءبىرقاتار ەلدەرىندە جۇرگىزىلىپ جاتىر.

ماسساگەت