ەۋروكوميسسيا ءوز قىزمەتكەرلەرىنە قىتايلىق تيكتوك الەۋمەتتىك جەلىسىن قولدانۋعا تىيىم سالدى
مۇنداي شەشىم ەۋروكوميسسيانىڭ كيبەرقاۋىپسىزدىك ەرەجەلەرىن قابىلداۋىمەن بايلانىستى، دەپ حابارلايدى قازاقپارات Euronews-كە سىلتەمە جاساپ.
ەۋروپا وداعىنىڭ اتقارۋشى بيلىگىنىڭ ۆەدومستۆو قىزمەتكەرلەرى مەن شەنەۋنىكتەرىنە جۇمىس قۇرىلعىلارىنان TikTok-تى ءوشىرىپ تاستاۋعا 15-ناۋرىزعا دەيىن ۋاقىت بەرىلدى.
ىشكى نارىق ماسەلەلەرى جونىندەگى ەۋروكوميسسار تەرري برەتون: «ەۋروكوميسسيا ارىپتەستەرىمىزدىڭ جانە بىزبەن سەرىكتەستىك ورناتقانداردىڭ بارلىعىنىڭ كيبەرقاۋىپسىزدىگىنە الاڭدايدى. شەشىم كيبەرقاۋىپسىزدىك ماقساتىندا قابىلدانىپ وتىر»، - دەپ اتاپ ءوتتى.
ال ەۋروپالىق ب ا ق تاراتىپ جاتقان TikTok وكىلىنىڭ مالىمدەمەسىندە كومپانيا مۇنداي شەشىمگە وكىنىش بىلدىرەتىنى جانە ول «قاتە ءارى تەرىس پىكىرگە نەگىزدەلگەن» دەپ جازىلعان.
كەيىنگى ايلاردا TikTok باتىستىڭ ءجىتى نازارىنا ىلىكتى. ولار قىتاي بيلىگى TikTok قولدانۋشىلارىنىڭ جەكە دەرەكتەرىن پايدالانا الادى دەپ قاۋىپتەنەدى.
ا ق ش-تا باعدارلامانى فەدەرالدى ۇكىمەت قۇرىلعىلارىندا پايدالانۋعا تىيىم سالىنعان. ال كەي امەريكالىق زاڭ شىعارۋشىلار ەلدە TikTok جۇمىسىن تولىق توقتاتۋعا تىرىسىپ جاتىر.
