الەمدە ەكى مينۋت سايىن ءبىر جۇكتى ايەل قايتىس بولادى
ميلليونداعان ايەل ءالى دە ساپالى مەديتسينالىق كومەككە قول جەتكىزە الماي وتىر، دەيدى د د س ۇ باس ديرەكتورى.
ءار ەكى مينۋت سايىن الەمدە ءبىر ايەل بوسانىپ جاتىپ نەمەسە جۇكتىلىك كەزىندە ومىردەن وتەدى.
مۇنداي دەرەكتەر دۇنيەجۇزىلىك دەنساۋلىق ۇيىمى مەن ب ۇ ۇ- نىڭ باسقا دا مەكەمەلەرى دايىنداعان، 23- اقپاندا جاريالانعان «انا ءولىمى تەندەنتسياسى» بايانداماسىندا كەلتىرىلدى.
2020-جىلى 287 مىڭ ءولىم تىركەلگەن. 2000-2015-جىلدار ارالىعىندا ساراپشىلار انا ءولىمىنىڭ ازايعانىنا قۋانعان ەدى.
ءبىراق 2016-جىلدان 2020-جىلعا دەيىنگى ارالىقتا ەۋروپا مەن سولتۇستىك امەريكادا انا ءولىمىنىڭ كوەففيتسيەنتى 17 پايىزعا، لاتىن امەريكاسى مەن كاريب باسسەينى ەلدەرىندە 15 پايىزعا ارتقان، دەلىنگەن باياندامادا.
ءولىم كورسەتكىشى، اسىرەسە، قاقتىعىس ايماقتارى مەن كەدەي وڭىرلەردە كوبىرەك.
ساراپشىلاردىڭ پىكىرىنشە، ەڭ جوعارعى ءابسوليۋتتى كورسەتكىش بۇرىنعىشا الەمنىڭ كەدەي ەلدەرى مەن قارۋلى قاقتىعىس بولىپ جاتقان ەلدەردە.
2020-جىلى جالپى انا ءولىمىنىڭ 70 پايىزعا جۋىعى ساحارادان وڭتۇستىككە قاراي افريكا ەلدەرىندە تىركەلگەن.
ساپالى مەديتسينالىق كومەككە قول جەتكىزە المايتىن ميلليونداعان ايەل ءۇشىن جۇكتىلىك «وتە اۋىر ءارى قاۋىپتى سىناق»، دەپ مالىمدەدى ددسۇ ديرەكتورى تەدروس ادحانوم گەبرەيەسۋس.
جاڭا دەرەكتەر ءار ايەل مەن قىز مەديتسينالىق كومەكتىڭ ماڭىزدى تۇرلەرىن جۇكتىلىككە دەيىن، جۇكتىلىك كەزىندە جانە بالا دۇنيەگە كەلگەننەن كەيىن الاتىنداي جاعداي جاساۋ كەرەك ەكەنىن، ونى كەيىنگە قالدىرۋعا بولمايتىنىن كورسەتتى، دەپ اتاپ ءوتتى ول.
باياندامادا ايەلدەردىڭ ۇشتەن ءبىر بولىگى بوسانعانعا دەيىن ءوتۋ ۇسىنىلاتىن سەگىز تەكسەرىستىڭ ءتىپتى تورتەۋىنەن دە وتپەيتىنى جانە بوسانعاننان كەيىن نەگىزگى كومەك تۇرلەرىنىڭ ءوزىن المايتىنى ايتىلعان. ال 270 ميلليون ايەلدىڭ وتباسىن جوسپارلاۋدىڭ زاماناۋي تاسىلدەرىن قولدانۋعا مۇمكىندىگى جوق.
بۇۇ 2023-جىلعا قاراي انا ءولىمىن 100000 ءتىرى تۋىلعان بالاعا 70 جاعدايعا دەيىن تومەندەتۋدى جوسپارلاپ وتىر. 2000-جىلى بۇل كورسەتكىش 339 جاعداي بولسا، 2020-جىلى - 223 بولعان.
