كەيبىر ءىرى سالىقتار جەرگىلىكتى بيۋجەتكە بەرىلۋى مۇمكىن

استانا. قازاقپارات - ەلىمىزدە جينالاتىن كەيبىر ءىرى سالىق تۇرلەرىن جەرگىلىكتى بيۋجەتتىڭ قۇزىرەتىنە بەرۋ جاعى قارالىپ جاتىر.

بۇل تۋرالى ۇلتتىق ەكونوميكا ۆيتسە-ءمينيسترى ازامات امرين ءمالىم ەتتى، دەپ حابارلايدى قازاقپارات ءتىلشىسى.

«قازىر ءىرى سالىقتاردىڭ ءبىر بولىگىن جەرگىلىكتى بيۋجەتكە بەرۋدىڭ جولدارىن پىسىقتاپ جاتىرمىز. بىزدە ءتورت ءىرى سالىق ءتۇرى بار: كورپوراتيۆتىك تابىس سالىعى، قوسىلعان قۇن سالىعى، الەۋمەتتىك سالىق جانە جەكە تابىس سالىعى. بۇگىندە جەكە تابىس پەن الەۋمەتتىك سالىق جەرگىلىكتى بيۋجەتكە تيەسىلى. مەملەكەت باسشىسىنىڭ بىلتىر قىركۇيەكتەگى تاپسىرماسى بويىنشا جەرگىلىكتى بيۋدجەتتەردىڭ كىرىس بازاسىن نىعايتۋ جۇمىسىن جالعاستىرامىز»، - دەدى ازامات امرين سەناتتا وتكەن دوڭگەلەك ۇستەل بارىسىندا.

ۆيتسە-ءمينيستردىڭ ايتۋىنشا، بۇگىندە كەڭ تارالعان پايدالى قازبالاردى ءوندىرۋ سالىعىن دا جەرگىلىكتى بيۋجەتتىڭ قۇزىرەتىنە بەرۋ جاعى قارالىپ جاتىر.

«جالپى، سالىق بازاسىنان جەرگىلىكتى بيۋجەتتەرگە تيەسىلى ءتۇسىم - %35، بۇل - 5 تريلليون تەڭگەدەن استام. ەكىنشى دەڭگەيدەگى (وبلىستىق) بيۋجەت بويىنشا كورسەتكىش - %62. ءۇشىنشى دەڭگەيدەگى (اۋداندىق) بيۋجەتتەر - %37. ال، جەرگىلىكتى ءوزىن-ءوزى باسقارۋ ورگاندارىندا (ءتورتىنشى دەڭگەيدەگى بيۋجەت) - %1. تۇسكەن قاراجاتتى ءبولۋدى اكىمدىك پەن ءماسليحات جۇزەگە اسىرادى»، - دەيدى ول.