قازاقستان اسكەرىندەگى جاۋىنگەرلىك دايارلىق تاسىلدەرى قالاي وزگەرىپ جاتىر
بۇل تۋرالى ق ر قورعانىس ءمينيسترىنىڭ ورىنباسارى سۇلتان قامالەتدينوۆ ايتتى، دەپ حابارلايدى قازاقپارات ءتىلشىسى.
«باسقا مەملەكەتتەردىڭ قارۋلى كۇشتەرى بۇل سالاعا تەرەڭ تالداۋ جۇرگىزىپ، سوعىس ءىس-قيمىلدارىنىڭ بارىسىن بايقاپ وتىر. وسىدان ءتيىستى قورىتىندىلار دا جاسالدى. ءبىر-بىرىنە ۇقساس قارۋلى قاقتىعىستار بولمايدى، ءارقايسىسىنىڭ وزىندىك ەرەكشەلىگى بار. سوندىقتان، ءبىز دە تالداۋ جۇرگىزىپ، ءتيىستى قورىتىندىلار جاسايمىز، جاۋىنگەرلىك دايىندىق باعدارلاماسىنا وزگەرىستەر ەنگىزەمىز»، - دەدى سۇلتان قامالەتدينوۆ سەناتتا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، قاشىقتان باسقارىلاتىن درونداردىڭ وپەراتورلارىنا قاتىستى وقۋ-جاتتىعۋلارعا ەرەكشە نازار اۋدارىلىپ وتىر. بۇل باعىتتا ەلىمىزدە ولاردىڭ دايارلىعىنا باسا ءمان بەرىلگەن.
«قازىرگى كەزدە الەمدەگى اسكەري قاقتىعىستارعا قاراساق، ۇشقىشسىز اپپاراتتار بارلاۋ قىزمەتىنە، سوققى جاساۋ ءىس-قيمىلدارىنا جۇمىلدىرىلىپ جاتىر. ەكىنشىدەن، ارتيللەريانىڭ دا مۇمكىندىگى زور. جاۋىنگەرلىك دايىندىق بارىسىندا ارتيللەريا اسكەرلەرىن جۇمىلدىرۋ ەڭ كەڭ تاراعان تاسىلدەردىڭ بىرىنە اينالدى»، - دەدى ءمينيستردىڭ ورىنباسارى.
بۇدان بۇرىن حابارلانعانداي، سۇلتان قامالەتدينوۆ قارۋ-جاراق پەن اسكەري تەحنيكانى مەملەكەتتىك ساتىپ الۋ بويىنشا ءتيىستى جوسپار بار ەكەنىن ايتتى.
سونىمەن قاتار، بيىل اسكەري سالاداعى وقىتۋشىلار مەن دارىگەرلەردىڭ جالاقىسى وسەدى.
ءمينيستردىڭ ورىنباسارى قازاقستاندا جەكە اسكەري كومپانيالار قۇرىلمايتىنىن ءمالىم ەتتى.
