تۇركيا حالقى جەتىم قالعان بالالاردى اسىراپ الۋعا نيەت ءبىلدىردى - ۋفۋك ەكيدجي

استانا. قازاقپارات - تۇركيا حالقى جەتىم قالعان بالالاردى اسىراپ الۋعا نيەت ءبىلدىردى. مۇنى تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي ءمالىم ەتتى، دەپ حابارلايدى قازاقپارات ءتىلشىسى.

«تۇركياداعى وتباسىلار جەر سىلكىنىسى كەزىندە اتا-اناسىنان ايرىلعان بالالارعا پاترونات وتباسى بولۋدى سۇرادى. كەشە جاريالانعان رەسمي مالىمەتكە سايكەس، تىركەلگەن 1858 بالانىڭ 1645 ءىنىڭ كۋالىكتەرى انىقتالدى. ولاردىڭ 1314 ءى انىقتالىپ، وزدەرىنىڭ وتباسىلارىنا تابىستالدى. 213 بالا بويىنشا كۋالىكتەرىن انىقتاۋ جۇمىستارى جالعاسىپ جاتىر. جەر سىلكىنىسى كەزىندە جەتىم قالعان بالالار تۇركيانىڭ وتباسى ىستەرى جانە الەۋمەتتىك قىزمەت كورسەتۋ مينيسترلىگىنىڭ قامقورلىعىندا. ولاردىڭ جەكە باسى تۋرالى مالىمەتتەر انىقتالىپ، وتباسىلارى تابىلسا، وندا بالالار ءوز جانۇيالارىنا بەرىلەدى. سونىمەن قاتار، ولار ۇنەمى وسى مينيسترلىكتىڭ باقىلاۋىندا بولادى. كوپ ءبۇلدىرشىن جاراقات الىپ، كۇيزەلىسكە ۇشىرادى. ولارعا پسيحولوگيالىق كومەك كەرەك»، - دەدى ۋفۋك ەكيدجي.

ۋفۋك ەكيدجي قازىرگى تاڭدا ءزىلزالادان زارداپ شەككەن 1,6 ميلليون تۇركيا ازاماتىنىڭ باسپانا ماسەلەسى شەشىلگەنىن مالىمدەدى.

سونىمەن قوسا، بۇگىنگە دەيىن جەر سىلكىنىسىنەن قيراعان جانە قۇلاۋ الدىندا تۇرعان 156 مىڭ عيمارات انىقتالعان.

ەسكە سالايىق، 6- اقپاندا كاحرامانماراشتا ماگنيتۋداسى 7 بالدان اساتىن ەكى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا دا سەزىلدى.