قازاقستاننان تۇركياعا تاعى ەكى ۇشاق گۋمانيتارلىق كومەك جەتكىزىلەدى

استانا. قازاقپارات - ەلورداداعى ەلشىلىكتە وتكەن بريفينگىدە تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي قازاقستان تاراپىنان قانداي گۋمانيتارلىق كومەك كورسەتىلگەنىن ايتتى، دەپ حابارلايدى قازاقپارات ءتىلشىسى.

«قازاقستان ۇكىمەتى ۇسىنعان 55 توننا گۋمانيتارلىق كومەك وتكەن دەمالىس كۇندەرى جەر سىلكىنىسى بولعان ايماقتارعا جەتكىزىلدى. ءبىزدىڭ ەلشىلىك پەن باس كونسۋلدىققا ەرىكتىلەر اكەلگەن جۇكتەر ەلىمىزگە جىبەرىلدى جانە اپاتتان زارداپ شەككەندەرگە تابىستالدى. جينالعان قوسىمشا گۋمانيتارلىق كومەك ق ر ىشكى ىستەر مينيسترلىگىنە قاراستى ۇلتتىق ۇلان بولگەن ۇشاقتارمەن ءبىزدىڭ ەلگە جەتكىزىلەدى. بۇگىن استانادان ءدال وسى ۇلتتىق ۇلانعا تيەسىلى العاشقى ۇشاق ۇشىپ شىقتى. ەرتەڭ الماتىدان تاعى ءبىر ۇشاق تۇركياعا جىبەرىلەدى. وسى زاتتاردى قوسقاندا قازاقستاننان 250 تونناعا جۋىق گۋمانيتارلىق كومەك جونەلتىلەدى»، - دەپ توقتالدى ۋفۋك ەكيدجي.

ول قازىرگى تاڭدا ءزىلزالادان زارداپ شەككەن 1,6 ميلليون تۇركيا ازاماتىنىڭ باسپانا ماسەلەسى شەشىلگەنىن مالىمدەدى.

سونىمەن قوسا، بۇگىنگە دەيىن جەر سىلكىنىسىنەن قيراعان جانە قۇلاۋ الدىندا تۇرعان 156 مىڭ عيمارات انىقتالعان.

بۇعان قوسا، تۇركيا حالقى جەتىم قالعان بالالاردى اسىراپ الۋعا نيەت ءبىلدىرىپ جاتىر.

ەسكە سالايىق، 6- اقپاندا كاحرامانماراشتا ماگنيتۋداسى 7 بالدان اساتىن ەكى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا دا سەزىلدى.