جەر سىلكىنىسى ايماعىنداعى وقۋشىلار ناۋرىزدا ساباققا بارادى - تۇركيا ەلشىسى

استانا. قازاقپارات - ءزىلزالا بولعان ايماقتارداعى بالالاردى وقىتۋ ناۋرىز ايىندا قايتا باستالادى.

ەلشىلىك قابىرعاسىندا وتكەن بريفينگىدە تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي وسىلاي مالىمدەدى، دەپ حابارلايدى قازاقپارات ءتىلشىسى.

«تۇركيا بويىنشا مەكتەپتەر 20-اقپان كۇنى قايتا اشىلدى. جەر سىلكىنىسى بولعان وڭىرلەردە ۋاقىتشا مەكتەپتەر قۇرۋ جۇمىستارى ءجۇرىپ جاتىر. ال، ناۋرىزدا ءزىلزالا بولعان ايماقتاردا وقۋدى قايتا باستاۋ جوسپارلانىپ وتىر. وسى ايماقتان باسقا وڭىرلەرگە كوشكەن بالالاردى دا وقىتۋ جالعاسادى»، - دەپ توقتالدى ۋفۋك ەكيدجي.

ول قازىرگى تاڭدا ءزىلزالادان زارداپ شەككەن 1,6 ميلليون تۇركيا ازاماتىنىڭ باسپانا ماسەلەسى شەشىلگەنىن مالىمدەدى.

سونىمەن قوسا، بۇگىنگە دەيىن جەر سىلكىنىسىنەن قيراعان جانە قۇلاۋ الدىندا تۇرعان 156 مىڭ عيمارات انىقتالعان.

بۇعان قوسا، تۇركيا حالقى جەتىم قالعان بالالاردى اسىراپ الۋعا نيەت ءبىلدىرىپ جاتىر.

ەسكە سالايىق، 6-اقپاندا كاحرامانماراشتا ماگنيتۋداسى 7 بالدان اساتىن ەكى جەر سىلكىنىسى بولدى. جەراستى دۇمپۋلەرى ەلدىڭ 10 پروۆينتسياسىندا، سونداي- اق كورشىلەس مەملەكەتتەردە، سونىڭ ىشىندە سيريادا دا سەزىلدى.