قۇتقارۋشى تۇركياداعى ءزىلزالا تۋرالى: شىنىمەن وسىنداي جاعداي بولىپ جاتقانىنا سەنگىڭ كەلمەيدى

استانا. قازاقپارات - استانا قالاسى توتەنشە جاعدايلار دەپارتامەنتى جەدەل قۇتقارۋ جاساعىنىڭ باس قۇتقارۋشىسى راحات كەندىبايەۆ قازاقپارات تىلشىسىنە اپات سالدارىن جويۋ كەزىندە تاپ بولعان توسىن جايتتار تۋرالى ايتىپ بەردى.

«تۇركياعا كەلگەن بويدا ارنايى شتابقا باردىق. سول جەردە اتقاراتىن جۇمىسىمىزدىڭ ەگجەي- تەگجەيىن بىلدىك. اپات بولعان جەرگە بارعاندا كينوعا تاپ كەلگەندەي سەزىم بولدى. شىنىمەن وسىنداي جاعداي بولىپ جاتقانىنا سەنگىڭ كەلمەيدى. 7-8 قاباتتى ءزاۋلىم ۇيلەر جەرمەن- جەكسەن بولعان. ادامدارعا ايانىشسىز قاراماۋ مۇمكىن ەمەس. ءبارى شاتىرلاردى پانالاپ ءجۇردى. العاشقى ءۇش كۇندە 24 ساعاتتان جۇمىس ىستەدىك. بارعان كۇنى- اق ءۇش ادامدى ءۇيىندى استىنان ءتىرى الىپ شىقتىق. ونىڭ بىرەۋى ەر ادام، ەكەۋى ايەل بولاتىن. ايەلدەردىڭ ءبىرى ەگدە جاستاعى كىسى ەكەن»، - دەپ ەسكە الادى قۇتقارۋشى.

سونداي- اق، ول ءۇيىندى استىنان بالالاردىڭ دەنەسىن الىپ شىعۋدىڭ پسيحولوگيالىق سالماعى اۋىر بولعانىن ايتادى.

«كەز كەلگەن ادام مۇندايدى كورگەندە پسيحولوگيالىق زاقىم الۋى مۇمكىن. ءبىراق ءبىز توسىن جايتتارمەن ۇنەمى ۇشىراساتىندىقتان، وندايعا توزىمدىلىك قالىپتاسادى. ونىڭ ۇستىنە قانشا قينالىپ تۇرساق تا، ونداعى ادامدارعا ءوز ەموتسيامىزدى كورسەتپەۋىمىز كەرەك. اسىرەسە ءۇيىندى استىنان جاس بالالاردىڭ، ايەلدەردىڭ دەنەسىن الىپ شىعۋ اۋىر ءتيدى»، - دەيدى راحات كەندىبايەۆ.