مەملەكەتتىك قىزمەتكە ورنالاسۋدا قازاق ءتىلىن ءبىلۋ تالابى ەنگىزىلۋى مۇمكىن
بۇل تۋرالى ورتالىق كوممۋنيكاتسيالار قىزمەتىندە وتكەن بريفينگىدە مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى ازامات جولمانوۆ ايتتى، دەپ حابارلايدى قازاقپارات ءتىلشىسى.
«قازىر مەملەكەتتىك قىزمەتشىگە ازامات ءوتىنىش بەرگەن تىلدە جاۋاپ بەرۋى كەرەك دەگەن تالاپ قويىلادى. ول ءۇشىن ءبىز جۇمىس جاساپ جاتىرمىز. بۇگىنگى تاڭدا مەملەكەتتىك باسقارۋ اكادەمياسىنا ماگيستراتۋرا جانە دوكتورانتۋرا باعدارلامالارى بويىنشا وقۋعا ءتۇسۋ ءۇشىن قويىلاتىن شارتتاردىڭ ءبىرى - ازاماتتىڭ مەملەكەتتىك ءتىلدى مەڭگەرۋى ورتا دەڭگەيدەن تومەن بولماۋى ءتيىس.
سونداي-اق پرەزيدەنتتىك جاستار كادر رەزەرۆىنە ىرىكتەۋ كەزىندە مەملەكەتتىك ءتىلدى مەڭگەرۋ تۋرالى تالاپ بەكىتىلدى. قازىرگى ۋاقىتتا ءبىز مەملەكەتتىك قىزمەتكە ورنالاسۋ كەزىندە قازاق ءتىلىن مىندەتتى ءبىلۋ تالابىن ەنگىزۋ ماسەلەسىن تالقىلاپ جاتىرمىز. ەگەر بۇل تالاپ بەكىتىلەتىن بولسا، ونى قوسىمشا حابارلايمىز»، - دەدى ازامات جولمانوۆ.
سپيكەر مەملەكەتتىك قىزمەتشىلەردىڭ قازاق ءتىلدى مەڭگەرۋ ماسەلەسى كەيىنگى ۋاقىتتا قوعامدا قىزۋ تالقىلانىپ جۇرگەنىن اتاپ ءوتتى. ونىڭ ايتۋىنشا، قىزمەتشىلەر قوعام تالابىنا ساي وزدەرىنىڭ كاسىبي داعدىلارىن جەتىلدىرىپ وتىرۋى ءتيىس.
اۆتور
ءاليحان اسقار
