قازاقستاندا جىلدامدىقتى اسىرۋعا قاتىستى ايىپپۇلدار وزگەرۋى مۇمكىن

استانا. قازاقپارات - ادىلەت مينيسترلىگى جىلدامدىقتى اسىرىپ، جول قوزعالىسى ەرەجەلەرىن ورەسكەل بۇزاتىندار ءۇشىن جاڭا ايىپپۇلدار ەنگىزۋدى ۇسىنىپ وتىر.

«اشىق ن ق ا» سايتىندا «اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋ تۋرالى» زاڭ جوباسى جاريالانعان. جوبا جىلدامدىقتى ارتتىرۋ جانە باسقا دا جول قوزعالىسى ەرەجەلەرىن بۇزۋ دەرەكتەرى ءۇشىن ايىپپۇلداردى وزگەرتۋدى قاراستىرادى.

«بەكىتىلگەن قوزعالىس جىلدامدىعىن ساعاتىنا 40 تان 80 شاقىرىمعا دەيىن اسىرۋ 20 ا ە ك (69000 تەڭگە)، ساعاتىنا 80 جانە ودان دا كوپ شاقىرىم - 40 ا ە ك (138000 تەڭگە) كولەمىندە ايىپپۇل سالۋعا اكەپ سوعادى. ءبىر جىل ىشىندە جىلدامدىقتى ساعاتىنا 80 شاقىرىم جانە ودان دا كوپ قايتالاپ اسىرعانى ءۇشىن - 60 ا ە ك (207000 تەڭگە) كولەمىندە ايىپپۇل سالىنادى»، - دەلىنگەن قۇجاتتا.

سونىمەن قاتار، جوباعا 596-باپتا جاڭا تارماق ەنگىزىلدى، وعان سايكەس كولىك قۇرالدارىنا، جۇكتەرگە، جولدارعا، جول جانە وزگە دە قۇرىلىستارعا نەمەسە وزگە دە مۇلىككە زاقىم كەلتىرگەن، ماتەريالدىق زالال كەلتىرگەن قارسى جولاققا شىعىپ كەتكەنى ءۇشىن جۇرگىزۋشى 9 ايعا دەيىن كولىك قۇرالدارىن باسقارۋ قۇقىعىنان ايىرىلادى. سونداي-اق، زاڭ جوباسىنىڭ اۆتورلارى قارسى جولاققا شىققانى ءۇشىن جۇرگىزۋشى كۋالىگىنەن ايىرۋدىڭ ورنىنا 30 اەك (103500 تەڭگە) كولەمىندە ايىپپۇل سالۋدى ۇسىنعان.