جاپونيا - الەمدەگى ەڭ ەجەلگى مونارحيا

استانا. قازاقپارات- كۇنشىعىس ەلىندەگى يمپەراتورلىق اۋلەت قاي ۋاقىتتان باستاپ بيلىك ەتىپ كەلەدى، تاريحىنىڭ تامىرى قاي كەزدەن باستالادى؟

جاپونيانىڭ يمپەراتورلىق ديناستياسى ەشقاشان ۇزىلگەن ەمەس. ەجەلگى جاپون جۇرتىنىڭ اڭىزى بويىنشا، جاپونيا ارالدارىن كۇن قۇدايى اماتەراسۋ جاساعان. ونىڭ ۇرپاعى دزيممۋ ارالدىڭ بۇكىل حالقىن بىرىكتىرىپ، تۇڭعىش يمپەراتور ءتاجىن كيىپ، تاققا وتىرعان. كۇنشىعىس ەلىنىڭ قازىرگى بيلەۋشى يمپەراتورى اكيحيتو ءبىزدىڭ داۋىرىمىزگە دەيىنگى 711- جىلى جاپونيانىڭ نەگىزىن قالاعان تۇڭعىش يمپەراتور دزيممۋدىڭ تىكەلەي ۇرپاعى بولىپ سانالادى.

جاپون ەلىندە پاتشا نەمەسە پاتشايىم مونارح رەتىندە عانا ەمەس، قۇداي سياقتى ەرەكشە قۇرمەتكە يە. دەگەنمەن جاپون يمپەراتورلارى اركەز قۇدىرەتتى بولعان جوق، تاق ءۇشىن ديناستيالار اراسىندا تالاس-تارتىس، قانتوگىستەر، ازاماتتىق سوعىستار دۇركىن-دۇركىن بولدى. يمپەراتورلىققا تالاس XVI عاسىردا توكۋگاۆا ديناستياسىنىڭ بيلەۋشىلەرى تۇسىندا تىيىلىپ، بيلىك ءبىر قولعا بەرىك شوعىرلاندى. 200 جىل بويى ەل شەكاراسى جابىلىپ، شەتەلدىكتەردىڭ كەلۋىنە جانە جاپوندىقتاردىڭ شەتەلگە شىعۋىنا شەكتەۋ قويىلدى. جاپونيا ەلىنىڭ باسقا الەمنەن وقشاۋلانۋى ارقىلى ەسكى استاناسى كيوتودا يمپەراتورلىق بيلىك بۇگىنگە دەيىن ۇزىلمەي جالعاستى.