ەلىمىزدىڭ قارۋلى كۇشتەرى جىل سايىن جاڭا تەحنيكامەن تولىعۋدا

استانا. قازاقپارات- اسكەريلەردىڭ قارۋ- جاراعىنا ەندى بيولوگيالىق بارلاۋ ماشيناسى قوسىلدى. ساربازدار زاماناۋي موبيلدى تەحنيكانىڭ مۇمكىندىگىمەن تانىسىپ، ۆەدومستۆوارالىق دالا جاتتىعۋىندا سىناپ كوردى.

ايتا كەتەيىك، سوڭعى جىلدارى رادياتسيالىق، حيميالىق جانە بيولوگيالىق قاۋىپتەرمەن كۇرەس سالاسىنا دەن قويىلعان. بۇل وتاندىق قارۋلى كۇشتەر قاتارىنا وتكەن جىلى ەنگىزىلگەن بيولوگيالىق بارلاۋ ماشيناسى.

موبيلدى زەرتحانانىڭ ماقساتى - ۋلانعان ايماققا مامانداردى جىلدام جەتكىزىپ، سۋ، توپىراق جانە اۋادان سىناما الۋعا ارنالعان. ميكرواۆتوبۋس شاناعىنداعى تەحنيكا ەلىمىزدە قۇراستىرىلعان. ازىرگە رەسپۋبليكا بويىنشا 5 ماشينا بار ەكەن.

ابىلاي بەركىنوۆ، موبيلدى زەرتحانا باسشىسى:

- ءبىز العاشقى تالداۋ بارىسىندا ءسىبىر جاراسى، كوروناۆيرۋس، وبا جانە تىرىسقاق سىندى جىلدام تارالاتىن اۋرۋلاردى بىردەن انىقتاي الامىز. بيولوگيالىق بارلاۋ ماشيناسىندا ءۇش ادام بولادى. ياعني، جۇرگىزۋشى، كوماندير جانە لابورانت بار.

ۆەدموستۆوارالىق دالالىق وقۋ جاتتىعۋلارى باراسىندا ساربازدار شارتتى تۇردەگى رادياتسيالىق، حيميالىق جانە بيولوگيالىق زياندى زاتتارمەن زاقىمدالعان اۋماقتا جۇمىس ىستەدى. ۋلانعان جەردى انىقتاپ، سىناما الىپ، زەرتحاناعا جىبەردى. وعان قوسا، اۋماقتى زالالسىزداندىرۋ بارىسىندا لاڭكەس توپتارمەن كۇرەس تاسىلدەرىن كورسەتتى.

جۇك كولىگىنىڭ بازاسىندا قۇراستىرىلعان ەسەپتەۋ تالداۋ ستانتسياسى قاۋىپتى ايماقتاردا جۇمىس ىستەۋگە ارنالعان. ناقتىراق ايتساق، مۇندا بيولوگيالىق، رادياتسيالىق سىندى ءارتۇرلى ۋلى زاتتاردى تالداپ، ەسەپتەيدى. ودان كەيىن موبيلدى شتابتا جيناقتالعان اقپاراتتار مىنا كومپيۋتەر ارقىلى وڭدەلىپ، ارمەن قاراي ناتيجەسى سپۋتنيك ارقىلى ورتالىققا جىبەرىلەدى.

ەسكە سالا كەتەيىك، قارۋلى كۇشتەردەگى رادياتسيالىق، حيميالىق جانە بيولوگيالىق قورعاۋ ءبولىمى ساربازدارى كوروناۆيرۋس كەزىندە جۇمىس ىستەدى. 3 مىڭ سارباز الماتىداعى 60 مىڭ شارشى مەتر اۋماقتى جانە 4 مىڭ شاقىرىم جولدى زالالسىزداندىرعان بولاتىن.

الماس كوپجاسار، دەسانتتىق شابۋىلداۋ اسكەرلەرى قولباسشىسى باسقارماسىنىڭ اعا وفيتسەرى:

- نەگىزگى ماقسات - رادياتسيالىق، حيميالىق جانە بيولوگيالىق قورعاۋ، بارلاۋ قارۋ- جاراعى مەن قۇرالدارىنىڭ جاڭا ۇلگىلەرىن زەردەلەپ، وقىپ، ۇيرەنۋ. ولاردىڭ ىشىندە اتاپ ايتاتىن بولساق، ەسەپ تالداۋ ستانسياسى، بيولوگيالىق بارلاۋ ماشيناسى. بۇل ماشينا 2022 -جىلى عانا اسكەر قاتارىنا ەنگىزىلدى.

200-دەن اسا مامان قاتىسقان ۆەدومستۆوارالىق دالالىق وقۋ- جاتتىعۋلارى 13- اقپاندا باستالعان. وعان دەسانتتىق شابۋىلداۋ اسكەرلەرى، ۇلتتىق ۇلان ساربازدارى جانە توتەنشە جاعدايلار مينيسترلىگىنىڭ بولىمشەلەرى قاتىستى.

www.24.kz