ا ق ش- تاعى قازاق دياسپوراسى قازاقستاننىڭ قولداۋىن كورىپ وتىر
شارا ونلاين رەجيمدە وتكەنىمەن، اسا مازمۇندى ءارى پايدالى بولدى. قازاقستان رەسپۋبليكاسىنىڭ امەريكا قۇراما شتاتتارىنداعى ەلشىسى ەرجان اشىقبايەۆ كەزدەسۋگە كەلگەن قازاقتاردىڭ اماندىعىن سۇراي كەلىپ، 2023 -جىلدىڭ 19-ناۋرىزىندا قازاقستاندا ءماجىلىس جانە ءماسليحاتتار سايلاۋى بولاتىنىن اتاپ ءوتتى. بۇل كۇنى ا ق ش- تا جۇرگەن قازاقستان ازاماتتارىنا دا داۋىس بەرۋ قۇقىعىن پايدالانۋعا مۇمكىندىك بەرىلمەكشى. ناقتىراق ايتساق، ەلدىڭ ءۇش قالاسىندا جەرگىلىكتى ۋاقىت بويىنشا تاڭعى ساعات 7.00 مەن 8.00 ارالىعىندا سايلاۋ ۋچەسكەلەرى جۇمىس ىستەيدى. اتالعان داۋىس بەرۋ ۋچاسكەلەرى ۆاشينگتون، نيۋ- يورك جانە سان- فرانسيسكو قالالارىندا ورنالاسقان.
قازاقستان ديپولماتيالىق مەەكەمەسىنىڭ باسشىسى ەلىنىڭ تاعدىرى مەن ساياسي دامۋىنا بەيجاي قارامايتىن قازاقستان ازاماتتارىن وسى ۋچاسكەلەرگە كەلۋگە، سول ارقىلى ازاماتتىق مىندەتتەرىن اتقارىپ، ق ر پارلامەنت ءماجىلىسىنىڭ دەپۋتاتتىعىنا ۇمىتكەرلەرگە داۋىس بەرۋگە شاقىردى.
بۇل جولعى سايلاۋ ۇلىستىڭ ۇلى كۇنى - ناۋرىز مەرەكەسىنە ءدوپ كەلىپ وتىر. ەلشىنىڭ ايتۋىنشا، وسى مەيرامنىڭ قۇرمەتىنە وراي قازاقستاننان ءبىر توپ ونەرپاز كەلىپ، ا ق ش- تاعى قازاق دياسپوراسىنا ونەر كورسەتپەك. قازىر ىرىكتەلگەن مۋزىكانتتاردىڭ ۆيزاسىن رەتتەۋ جۇمىستارى ءجۇرىپ جاتقان كورىنەدى.
كەزدەسۋدە «وتانداستار» كوممەرتسيالىق ەمەس اكسيونەرلىك قوعامنىڭ پرەزيدەنتى ابزال ساراپبەكوۆ تە ءسوز الدى. سوزىنە قاراعاندا، قور مۇنداعى قازاقتارمەن دە تىعىز بايلانىس ورناتىپ، قولداۋ شارالارىن قولعا الماقشى. سونداي- اق، قازاقستاننان تىسقارى ەلدەردە جۇرگەن قازاقتارعا جالپى كورسەتىلىپ جاتقان قولداۋ شارالارى تۋرالى مالىمەت بەردى. مۇنداي قولداۋدى ا ق ش- تاعى قازاق دياسپوراسى دا سەزىنىپ وتىر.
سىرتتاعى قازاقتاردىڭ انا ءتىلىن ۇمىتپاۋىنا باعىتتالعان شارالارعا توقتالعان ابزال ساپاربەكوۆ قازاق ءتىلىن وقىتاتىن كۋرستار ونلاين فورماتتا دا، وففلاين فورماتتا جۇمىس ىستەيتىنىن اتادى. الداعى ۋاقىتتا حالىقارالىق «وتانداستار فورۋمىن» وتكىزۋ جوسپاردا بار ەكەنى دە ايتىلدى.
ال بەلسەندى قازاق جاستارى ءۇشىن «كيەلى قازاقستان» ەكسكۋرسياسىن وتكىزۋ قاراستىرىلىپ وتىر. شەتەلدەگى دارىندى قازاق جاستارىن تاۋىپ، قولداۋ باعىتىندا «قاسيەتتى قازاق ەلى» ونەر فەستيۆالىن وتكىزۋ جوسپارلانعان. جالپى قور سىرتتاعى قازاق جاستارىنا كوبىرەك كوڭىل بولۋگە نيەتتى كورىنەدى. «جازعى لاگەر» دەگەن اتپەن قازاق جاستارىنىڭ لاگەرىن ۇيىمداستىرىپ، «جاس قازاق» دەگەن اتپەن قازاق جاستارىنىڭ حالىقارالىق كلۋبىن قۇرۋ كوزدەلىپ وتىر. قازاق تىلىنەن «اتا جۇرتىم» دەگەن اتاۋمەن حالىقارالىق وليمپيادا وتكىزۋ قولعا الىنعانى دا ايتىلدى. مۇنىڭ سىرتىندا ءتۇرلى سيپاتتاعى حالىقارالىق كونكۋرستار ءوتۋى مۇمكىن. سىرتتاعى وتانداستاردى قولداۋعا ارنالاتىن حالىقارالىق ورتالىققا ۇلكەن سەنىم ارتىلىپ وتىر. وسى Call-ورتالىق ارقىلى قازاق ءتىلىن وقىتۋ كۋرستارىن جۇرگىزىپ، ۇلتتىق سالت- ءداستۇر مەن ۇلتتىق مادەنيەتكە باۋلۋ شارالارى ۇيىمداستىرىلۋدا. سونداي- اق، شەتەلدە جۇمىس ىستەپ تۇرعان قازاق ءتىلدى بۇقارالىق اقپارات قۇرالدارىقاۋىمداستىعىنىڭ جۇمىسىن دا وسى ورتالىقتىڭ كومەگىمەن ۇيىمداستىرىپ، جەتىلدىرۋ جوسپارلانعان.
كەزدەسۋگە 50 دەن استام ادام قاتىستى. ونىڭ ىشىندە امەريكا قۇراما شتاتتارىنىڭ كاليفورنيا (California Qazaq Community، ساكرامەنتو جانە لوس- اندجەلەس قالالارى)، پەنسيلۆانيا (Kazakh American Community Inc، فيلادەلفيا قالاسى)، نيۋ- يورك (Kaz Community USA، Kazakh American Center، نيۋ- يورك قالاسى)، تەحاس (Shanyraq Kazakh Foundation, حيۋستون قالاسى)، فلوريدا (Florida.kz، مايامي قالاسى)، ماسساچۋسەتس (MIRAS Boston Kazakh Cultural Foundation Group, ۋەلسلي، فيلادەلفيا جانە بوستون قالالارى) ، يللينويس (Kazakh American Society of Chicago, چيكاگو قالاسى)، ۆيردجينيا (Kazakhstan community of Washington DC area)، مەريلەند (Kazakh American Association)، سولتۇستىك كارولينا (شارلوتت قالاسى)، ۆاشينگتون (سيەتل قالاسى) شتاتتارى مەن گاۆاي ارالدارىندا تۇرىپ جاتقان قازاق دياسپوراسىنىڭ وكىلدەرى بار.
كەزدەسۋ كەزىندە ءتۇرلى تاقىرىپتار ورتاعا تاستالىپ، تالقىلاندى. سىرتتاعى قازاقتاردىڭ قۇرىلتايىن وتكىزۋ ماسەلەسى دە كۇن تارتىبىنە شىقتى. ناۋرىز مەرەكەسىن تويلاۋدىڭ ماسەلەسى دە اڭگىمە وزەگىنە اينالدى. شەتەلدەگى قازاقشا ءبىلىم بەرۋ جانە مادەنيەت ورتالىقتارىن قولداۋ، كونسۋلدىقتار جۇمىسى، لوگيستيكالىق پروبلەمالار، ۇيىمداستىرۋ جانە قارجىلىق ماسەلەلەر دە تالقىعا ءتۇستى. ەلشى كەزدەسۋدە ايتىلعان ۇسىنىستار مەن كوتەرىلگەن ماسەلەلەردىڭ ماڭىزدى دەگەندەرىن ديپلوماتتارعا پىسىقتاۋ تاپسىرىلاتىنىن ايتتى.
ونلاين بايلانىس جولعا قويىلعان داۋىردە الەمنىڭ ءار تۇكپىرىندە جۇرگەن قازاقتاردىڭ ءبىر- بىرىمەن ارالاس- قۇرالاس ءومىر سۇرۋىنە مۇمكىندىك اشىلىپ وتىر. ديالوگتىڭ مۇنداي ءتۇرى قازاقستان ەلشىلىگى مەن «وتانداستار» قورىنىڭ ا ق ش- تاعى قازاقتارمەن بايلانىسىن عانا تەرەڭدەتىپ قويماي، مۇنداعى دياسپورانىڭ ءوزارا ارالاسۋىنا دا سەپتىگىن تيگىزگەندەي. سول ارقىلى ولار وزەكتى ماسەلەلەردى بىرلەسىپ تالقىلاپ، شەشۋ جولدارىن پىسىقتاي الدى.
كەزدەسۋ امەريكا قۇراما شتاتتارىنىڭ ءار قيىرىندا جۇرگەن قازاقتاردىڭ اراسىنداعى جانە قازاقستانداعى جاۋاپتى ورىندارىمەن بايلانىستى قايتا ءبىر جانداندىرعانداي بولدى. ولاي دەيتىنىمىز، شارا اياسىندا قاجەتتى تەلەفون نومىرلەرى مەن ەلەكتروندى مەكەنجايلار تاراتىلدى. وسى بايلانىس دەرەكتەرى ارقىلى كەز كەلگەن قازاق دياسپوراسىنىڭ وكىلى تاپ كەلگەن پروبلەماسى تۋرالى ديپلوماتيالىق مەكەمەگە مالىمەت ۇسىنا الادى. ال ەلشىلىك پەن كونسۋلدىقتار ول مالىمەتتەردى «وتانداستار» قورىنا تابىستاپ وتىرادى.
قازاقستاننىڭ امەريكا قۇراما شتاتتارىنداعى ەلشىسى ەرجان اشىقبايەۆ ا ق ش- تاعى قازاق دياسپوراسىنا كەز كەلگەن كومەك پەن قولداۋ كورسەتۋگە دايىن ەكەندەرىن جەتكىزدى.
كەزدەسۋدى ۇيىمداستىرۋشى تاراپتار شاراعا قاتىسۋشىلارعا ارنايى ۋاقىت ءبولىپ، ورتاق ماسەلەلەردى تالقىلاۋعا قىزىعۋشىلىق تانىتىپ، بەلسەندى اتسالىسقاندارى ءۇشىن العىس ءبىلدىردى. قازاق دياسپوراسىنىڭ ا ق ش- تاعى وكىلدەرى دە مۇنداي كەزدەسۋدىڭ جالعاسى بولسا دەگەن تىلەكتەرىن ايتىپ، سىرتتاعى قازاقتاردى ۇمىتپاي، قولداۋعا دايىندىقتارىن بىلدىرگەن ۇيىمداستىرۋشىلارعا ريزا ەكەندەرىن جەتكىزدى.
