پرەزيدەنتتىك جاستار كادرلىق رەزەرۆىنە كەزەكتى ىرىكتەۋ كۇزدە وتەدى

استانا. قازاقپارات - بيىل كۇزدە پرەزيدەنتتىك جاستار كادرلىق رەزەرۆىنە كەزەكتى ىرىكتەۋ وتەدى. ورتالىق كوممۋنيكاتسيالار قىزمەتىندە وتكەن بريفينگىدە مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى ازامات جولمانوۆ وسىلاي مالىمدەدى، دەپ حابارلايدى قازاقپارات ءتىلشىسى.

«بۇگىنگى كۇنى رەزەرۆكە قابىلدانعان 350 ازاماتتىڭ مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ ءارتۇرلى لاۋازىمدارىنا 262 ءسى نەمەسە %75 تاعايىندالدى. ونىڭ ىشىندە: ورتالىق مەملەكەتتىك ورگاندارعا – 131، جەرگىلىكتى اتقارۋشى ورگاندارعا – 41، ۇلتتىق كومپانيالارعا – 54، وزگە دە ۇيىمدارعا - 36. سونداي-اق، 28 مامان ساياسي لاۋازىمدارعا تاعايىندالدى. «ا» كورپۋسىنىڭ لاۋازىمدارىنا 8 ادام ورنالاستى»، - دەدى ول.

ازامات جولمانوۆ اتاپ وتكەندەي، پرەزيدەنتتىك جاستار كادرلىق رەزەرۆىنە كەزەكتى ىرىكتەۋ بيىل كۇزدە وتەدى. ايتۋىنشا، ىرىكتەۋ مەملەكەتتىك ورگانداردىڭ سالالىق كادرلارعا دەگەن قاجەتتىلىكتەرىنە نەگىزدەلەدى.