اۋىل شارۋاشىلىعى ءۇشىن ديزەل وتىنىنا بىركەلكى باعا بەكىتىلدى

استانا. قازاقپارات - بيىل اۋىل شارۋاشىلىعى سالاسى ءۇشىن ديزەل وتىنىنا بىركەلكى باعا بەكىتىلدى. بۇل تۋرالى اۋىل شارۋاشىلىعى ءمينيسترى ەربول قاراشوكەيەۆ ءمالىم ەتتى، دەپ حابارلايدى قازاقپارات ءتىلشىسى.

«كوكتەمگى ەگىس جۇمىستارى بويىنشا وڭىرلەرگە 413,0 مىڭ توننا ديزەل وتىنى ءبولىندى. بۇل - وتكەن جىلعا قاراعاندا 13,0 مىڭ تونناعا كوپ. ەنەرگەتيكا مينيسترلىگى جانە مۇناي وڭدەۋ زاۋىتتارىمەن اقىلداسا كەلە ديزەلدىڭ تونناسى 222,0 مىڭ تەڭگە نەمەسە ءليترى 184 تەڭگە بولىپ بەكىتىلدى. بيىل ارزانداتىلعان جانار- جاعارماي تەك وڭتۇستىك وبلىستارعا عانا ەمەس، سولتۇستىك وڭىرلەرگە دە اقپاننان باستاپ جونەلتىلە باستادى»، - دەدى ەربول قاراشوكەيەۆ ۇكىمەت وتىرىسىندا.

ودان ءارى مينيستر كوكتەمگى ەگىستىككە دايىندىق بارىسىنا توقتالدى.

«ەگىس ناۋقانىنا كىرىسۋگە 160,0 مىڭ تراكتور، 5 مىڭنان استام جوعارى ءونىمدى ەگىس كەشەنى، 78 مىڭ تۇقىم سەپكىش جانە 226 مىڭ توپىراق وڭدەۋ قۇرالى دايىندالدى. سونىمەن قاتار، ءبىر مەزگىلدە بىرنەشە تەحنولوگيالىق وپەراتسيانى ورىندايتىن زاماناۋي ەگىس كەشەندەرىنىڭ 5 مىڭنان استامى بار. جالپى، قازىرگى كۇنى كوكتەمگى ەگىس جۇمىستارىنا تەحنيكالاردىڭ دايىندىعى - شامامەن %93. جۇمىس باستالعانشا تەحنيكا %100 دايىن بولادى»، - دەيدى ول.

بۇعان دەيىن ۆەدومستۆو باسشىسى بيىل ەگىستىك القابىنىڭ 68,6 مىڭ گەكتارعا ۇلعاياتىنىن ايتقان ەدى.