وبلىس ورتالىقتارى مەن ءىرى قالالاردىڭ ديزاين كودى ازىرلەنىپ جاتىر
بۇل تۋرالى قازاقپارات يندۋستريا جانە ينفراقۇرىلىمدىق دامۋ مينيسترلىگىنە سىلتەمە جاساپ حابارلايدى.
قالالاردى كەشەندى قۇرىلىس سالۋ ستاندارتتارىنا بەيىمدەۋ شەڭبەرىندە شاعىن ساۋلەت تۇرلەرى مەن اباتتاندىرۋ تاسىلدەرىن قولدانا وتىرىپ، رەسپۋبليكالىق ماڭىزداعى قالالاردىڭ، وبلىس ورتالىقتارى مەن حالىق سانى 100 مىڭنان اساتىن ءىرى قالالاردىڭ ديزاين جوبالارىن (كودتارىن) دايىنداۋ جۇمىستارى قولعا الىندى.
ديزاين كود جەرگىلىكتى جەردىڭ ەرەكشەلىگىن ەسكەرە وتىرىپ، قالالىق كەڭىستىكتىڭ ءبىرتۇتاس كورىنىسىن انىقتاۋ ارقىلى ونى وزگەرتۋگە مۇمكىندىك بەرەدى. بۇل رەتتە ديزاين كود دايىنداۋ جۇمىسىنا عيماراتتاردىڭ قاسبەتىن ارلەۋ، ينفراقۇرىلىم جۇيەلەرىنە ديزاين ەلەمەنتتەرىن ەنگىزۋ، سونداي- اق جەكەلەگەن فۋنكتسيونالدى ايماقتارعا، اباتتاندىرۋ، كوگالداندىرۋ جانە ناۆيگاتسيا جۇيەلەرى مەن ماڭدايشالارعا كونتسەپتۋالدى شەشىمدەر مەن تاسىلدەر قولدانىلادى.
قازىر استانا، الماتى جانە اقتوبە قالاسىنىڭ ديزاين كودى ازىرلەنگەن. قالعان قالالار بويىنشا جاڭا ستاندارتتارعا سايكەس دايىندالىپ جاتىر.
ۆەدومستۆودان اتاپ وتكەندەي، ديزاين كود ستيليستيكالىق تۇرعىدان ءبىرتۇتاس، جايلى جانە قاۋىپسىز قالالىق ورتانى نەمەسە كەڭىستىكتى قولايلى قالىپتاستىرۋعا مۇمكىندىك بەرەتىن ەرەجەلەر، تالاپتار مەن ۇسىنىستاردىڭ جيىنتىعى سانالادى.
