اۋىر اتلەتيكا فەدەراتسياسى دوپينگ داۋىنا بايلانىستى مالىمدەمە جاسادى
«بۇل دوپينگ باقىلاۋدى ىشكى، ياعني قازاقستاندىق دوپينگكە قارسى ورتالىق جۇزەگە اسىرعانىن جانە ونىڭ ناتيجەسى فەدەراتسيا ءۇشىن دە، قۇرامانىڭ باسقا مۇشەلەرى ءۇشىن دە ەشقانداي سالدارعا اكەپ سوقپايتىنىن اتاپ وتكىم كەلەدى. الايدا، دوپينگ قولدانعاندارعا قاتىستى شەشىم WADA كودەكسىنە جانە حالىقارالىق اۋىر اتلەتيكا فەدەراتسياسىنىڭ دوپينگكە قارسى ەرەجەلەرىنە سايكەس قابىلدانادى»، - دەيدى اۋىر اتلەتيكا فەدەراتسياسىنىڭ باس حاتشىسى الديار نۇرالينوۆ.
سونىمەن قاتار، ول بۇل جارىستان تىس باقىلاۋ سپورتشىلار قاتىسقان حالىقارالىق ستارتتان التى اي وتكەن سوڭ قابىلدانعانىن اتاپ ءوتتى.
«سوندىقتان ولاردىڭ ناتيجەسىن جويۋ نەمەسە مەدالداردى قايتارۋ ماسەلەسى تۋىندامايدى. بۇل اسىرەسە يگور سوننىڭ وليمپيادالىق سىيلىعىنا قاتىستى ەرەكشە اتاپ وتكىم كەلەدى. فەدەراتسيا دوپينگتىڭ كەز-كەلگەن كورىنىسىنە نولدىك توزىمدىلىك پرينتسيپىن ۇستانادى. تۇراقتى رەجيمدە دوپينگكە قارسى ەرەجەلەر بويىنشا حاباردار ەتۋ، سونداي-اق حالىقارالىق جارىستار قارساڭىندا ۇلتتىق قۇرامانىڭ بارلىق مۇشەلەرىن باقىلاۋ بويىنشا جۇمىس جۇرگىزىلىپ جاتىر. بۇل، ەڭ الدىمەن، حالىقارالىق دەڭگەيدە بۇزۋشىلىقتاردىڭ الدىن الۋ ءۇشىن قاجەت، ويتكەنى وليمپيادا بىلىكتىلىك جۇيەسى ەل سپورتشىلارى 3 تەن استام ءتارتىپ بۇزعان جاعدايدا، بۇكىل كوماندانى شەتتەتۋدى قاراستىرادى»، - دەيدى اۋىر اتلەتيكا فەدەراتسياسىنىڭ باس حاتشىسى.
بۇعان دەيىن توكيو وليمپياداسىندا قولا جۇلدەگەر اتانعان يگور سون 8 جىلعا سپورتتان شەتتەتىلگەنىن حابارلاعان ەدىك.
مادەنيەت جانە سپورت مينيسترلىگى يگور سوننىڭ وليمپيادا مەدالى مەن اقشالاي سىيلىقتان ايىرىلمايتىنىن مالىمدەدى.
الداعى ۋاقىتتا بىرنەشە جىل جارىسقا قاتىسا المايتىن اۋىر اتلەتتەردىڭ قاتارىندا مۇنان بولەك تاعى 8 سپورتشى بار.
