مينيستر ب ا ق تۋرالى زاڭدى سىناعاندارعا جاۋاپ بەردى
«ب ا ق تۋرالى زاڭناماعا وزگەرىستەر ءالى دە ەنگىزىلەدى. بۇگىندە جۇيەلى جۇمىس جالعاسىپ جاتىر. زاڭعا قاتىستى سىن-پىكىر ايتقان ارىپتەستەرىمىزبەن كەزدەسۋ دە جوسپاردا بار. زاڭناما ءالى تالقىلانۋ ۇستىندە. ءماجىلىستىڭ قاراۋىنا ءالى جەتكەن جوق. ب ا ق تۋرالى زاڭدى جەتىلدىرە تۇسۋدە ماجىلىسكە دەيىن ءبىراز جۇمىس ىستەۋ كەرەك. وسى ورايدا زاڭ جوباسىنا قاتىستى پىكىر ايتىپ جۇرگەن ارىپتەستەرىمىزدى ءماجىلىستىڭ جۇمىس توبىنا شاقىرامىز. ايتىلىپ جاتقان سىنداردان حابارىمىز بار»، - دەدى دارحان قىدىرالى ۇكىمەت وتىرىسىنان كەيىن تىلشىلەردىڭ ساۋالىنا جاۋاپ بەرە وتىرىپ.
ب ا ق تۋرالى جاڭا زاڭدا قانداي وزگەرىستەر بولاتىنى تۋرالى جازعان ەدىك.
«زاڭ جوباسى اياسىندا جۋرناليستەردىڭ مارتەبەسىن كوتەرۋ، مەملەكەتتىك اقپاراتتىق ساياساتتى قارجىلاندىرۋ تەتىكتەرىن رەفورمالاۋ، ءوزىن-ءوزى رەتتەۋ ينستيتۋتتارىن دامىتۋ، تەلەراديو حابارلارىن تاراتۋ سالاسىنداعى ترەندتەردى وزگەرتۋ جوسپارلانعان. اقپاراتقا قول جەتكىزۋ ماسەلەلەرى تۋرالى زاڭعا تۇزەتۋلەر ازىرلەندى. ۇسىنىلعان وزگەرىستەر ازاماتتاردىڭ اقپاراتقا قول جەتكىزۋ قۇقىعىن زاڭسىز شەكتەيتىن مەملەكەتتىك ورگانداردىڭ جاۋاپكەرشىلىگىن كۇشەيتەدى. اقپاراتتىق دوكترينا تالقىلاۋدان ءوتتى، سونداي- اق اقپارات سالاسىن دامىتۋدىڭ 2023-2027-جىلدارعا ارنالعان تۇجىرىمداماسىن دايىنداۋعا كىرىستىك»، - دەگەن ەدى اقپارات ءمينيسترى.
