وڭىرلەر اراسىنداعى اۋە بايلانىسىنىڭ ناشارلىعى تۋريزمگە كەرى اسەر ەتەدى - مينيسترلىك

استانا. قازاقپارات - ەل ىشىندەگى اۋە بايلانىسى ناشار. تيىسىنشە، بۇل ءتۋريزىمدى دامىتۋعا كەدەرگى كەلتىرەدى.

«اشىق» ن ق ا پورتالىندا جاريالانعان تۋريستىك سالانى دامىتۋدىڭ 2023-2029 -جىلدارعا ارنالعان تۇجىرىمداماسىندا وسىلاي جازىلعان، دەپ حابارلايدى قازاقپارات ءتىلشىسى.

«COVID-19 پاندەمياسىنا دەيىن قازاقستاننىڭ بارلىق وڭىرىنەن استانا جانە الماتى سياقتى ءىرى قالالارعا ۇشۋ گەوگرافياسى جولعا قويىلدى. دەگەنمەن قازاقستاننىڭ قالعان وڭىرلەرى اراسىندا بايلانىس ناشار، بۇل جالپى ىشكى ءتۋريزمدى دامىتۋعا كەدەرگى كەلتىرەدى. مىسالى، باتىس قازاقستاننان كەلگەن تۋريستەرگە قىسقا ۋاقىت ىشىندە شىعىس قازاقستانعا، ال سولتۇستىكتەن وڭتۇستىك قازاقستانعا اۋە كولىگىمەن بارۋ وتە قيىن. COVID-19 پاندەمياسىنا دەيىن ەلدەگى اۋەجايلاردىڭ جۇكتەمەسى شامامەن %20 قۇرادى»، - دەلىنگەن تۇجىرىمدامادا.

سونىمەن قوسا، قۇجاتتا ۇشاق بيلەتى قۇنىنىڭ قىمبات ەكەندىگى ايتىلعان. ونىڭ شەشىمى رەتىندە اۆمياكومپانيالار مەن تۋريسترىك وپەراتورلارعا قولداۋ شارالارىن كۇشەيتۋ ۇسىنىلادى. مادەنيەت مينيسترلىگىنىڭ دەرەگىنشە، بۇل باعىتتاعى جۇمىستار 2029 -جىلعا دەيىن كەزەڭ- كەزەڭىمەن ىسكە اسادى.

«قازاقستان رەسپۋبليكاسى اۆياكومپانيالارىنىڭ بيلەتتەرىنە باعالار تۇپكى تۇتىنۋشىلار ءۇشىن دە جوعارى بولىپ وتىر. سۇرانىس پەن پايدالانۋشى تۋرالى دەرەكتەرگە سۇيەنە وتىرىپ، باعا بەلگىلەۋدىڭ نارىقتىق تەتىكتەرى نەگىزىندە قالىپتاستىرىلادى. ياعني، ديناميكالىق باعا بەلگىلەۋ پايدالانىلادى. بۇل رەتتە باعالار سۇرانىسقا، اۆيابيلەتتى ساتىپ الۋدىڭ الدىن الا جۇرگىزىلۋىنە، رەيستى ورىنداۋ اپتاسىنىڭ كۇنىنە، رەيستىڭ ۇشۋ ۋاقىتىنا جانە تاعى دا باسقا بايلانىستى ۇستالۋى، كوتەرىلۋى جانە تومەندەۋى مۇمكىن. تۋريستىك دەستيناتسيالاردىڭ تەمىرجولدىق قۇرامداس بولىگى دە ءجىتى نازار اۋدارۋدى تالاپ ەتەدى»، - دەپ ماسەلەلەر كورسەتىلگەن قۇجاتتا.

تۇجىرىمداما 3-ناۋرىزعا دەيىن كوپشىلىك تالقىلاۋدا بولادى.