بولات اقشولاقوۆ گاز قوستىرۋدىڭ قىمباتتىعىن مويىندادى

استانا. قازاقپارات - گازعا قوسىلۋ قۇنىن تومەندەتۋگە باعىتتالعان بىرنەشە نۇسقا قاراستىرىلىپ جاتىر. بۇل تۋرالى ەنەرگەتيكا ءمينيسترى بولات اقشولاقوۆ ايتتى، دەپ حابارلايدى قازاقپارات ءتىلشىسى.

«شىنىمەن دە، ءبىرقاتار وڭىردە گازعا قوسىلۋ قۇنىنىڭ جوعارى ەكەندىگى بايقالادى. قازىرگى ۋاقىتتا قازاق گاز بەن جەرگىلىكتى اكىمدىكتەر بىرلەسىپ، بۇل ماسەلەنى قاراستىرىپ جاتىر، قوسىلۋ قۇنىن تومەندەتۋگە قاتىستى بىرنەشە ۇسىنىس بار. بۇگىن الماتى وبلىسىنىڭ اكىمى جۇرگىزىلگەن ءىس- شارالاردىڭ ارقاسىندا قوسىلۋ قۇنىن ەكى ەسەگە تومەندەتۋگە مۇمكىندىك بولعانىن ايتتى. ويتكەنى، شىندىعىندا دا قۇنى وتە جوعارى. قازىر ونى قالاي تومەندەتۋ كەرەكتىگىنە قاتىستى نۇسقالاردى قاراستىرىپ جاتىرمىز»، - دەدى بولات اقشولاقوۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا وراي.

مينيستر گازعا قوسىلۋ قۇنىنىڭ قانشالىق تومەندەۋى مۇمكىن ەكەندىگىن بولجاۋ قيىن ەكەندىگىن ايتادى. ويتكەنى، جابدىقتاردىڭ بىرنەشە ءتۇرى بار.

«گازدى ۇيگە دەيىن جەتكىزۋ قاجەت. ودان كەيىن ەسەپتەۋ جۇيەسى، قازاندىق قاجەت. بۇل ورايدا جابدىقتاردىڭ قۇنىن ەسكەرگەن ءجون. سەبەبى ولار ازىرشە وزىمىزدە شىعارىلمايدى. ولاردى سىرتتان اكەلەمىز. ەگەر جاپاي گازداندىرۋ باعدارلاماسىن قولعا الساق، وندا ول ماتەريالداردى وزىمىزدە ءوندىرۋ جاعىن ويلاستىرۋ قاجەت»، - دەدى ول.

ونىڭ اتاپ وتۋىنشە، بيىل ەلىمىزدى گازداندىرۋ دەڭگەيىن 60 پايىزعا جەتكىزۋ قاجەت. ال وعان قاجەتتى قاراجاتتى ەسەپتەۋ كەرەك. جالپى بيىل گازداندىرۋ جۇمىستارىنا 73 ميلليارد تەڭگە كوزدەلىپ وتىر.

«بۇل ماگيسترالدى گاز قۇبىرىنا جۇمسالاتىن شىعىن مولشەرى. ءبىز گازبەن جابدىقتاۋعا قوسىلعان ازاماتتاردىڭ سانىن 11,6-11,7 ميلليون ادامعا جەتكىزۋىمىز كەرەك»، - دەدى مينيستر.

فوتو: varva-slovo.com.ua

اۆتور

مارلان جيەمباي