قازاقستاندا ەسكىرگەن اتاۋلاردى وزگەرتۋ جۇمىستارى قالاي جۇرگىزىلەدى؟
وعان سايكەس، 2025 -جىلعا دەيىن اتاۋى ەسكىرگەن اكىمشىلىك اۋماق، ەلدى مەكەن، مەملەكەت مەنشىگىندەگى عيماراتتار، گەوگرافيالىق نىساندار مەن كوشەلەرگە جاڭا اتاۋ بەرۋ كوزدەلگەن. جالپى جول كارتاسىنا سايكەس، 3 مىڭعا جۋىق جاڭا اتاۋ بەرۋ جۇمىستارى جوسپارلانعان.
بۇل جۇمىستاردى اتقارۋ ءتارتىبى «قازاقستان رەسپۋبليكاسىنداعى ءتىل تۋرالى»، «قازاقستان رەسپۋبليكاسىنداعى اكىمشىلىك- اۋماقتىق قۇرىلىسى تۋرالى» زاڭدارىندا قاراستىرىلعان. زاڭناماعا سايكەس، جاڭا اتاۋ بەرۋ جانە ەسكىرگەن اتاۋدى وزگەرتۋ ءتارتىبى رەسپۋبليكالىق جانە جەرگىلىكتى ونوماستيكا كوميسسياسىنا تاپسىرىلادى. رەسپۋبليكالىق كوميسسيا قۇرامىندا دەپۋتاتتار، قوعام قايراتكەرلەرى، تاريحشىلار جانە ءتىل ماماندارى جانە ت. ب. بولادى. ال كوميسسيا قىزمەتىن مادەنيەت جانە سپورت مينيسترلىگى ۇيىمداستىرادى.
ونوماستيكا كوميسسياسىنىڭ نەگىزگى جۇمىسى نىسان، ەلدى مەكەن نەمەسە كوشە مەن داڭعىلعا جاڭا اتاۋ بەرۋگە نەمەسە ەسكىرگەن اتاۋدى وزگەرتۋگە قاتىستى قورىتىندى بەرۋ. رەسپۋبليكالىق ونوماستيكا كوميسسياسى جاڭا اتاۋ تاڭداۋ كەزىندە قولدانىلاتىن ناقتى ۇسىنىمداردى ازىرلەيدى. وسى ۇسىنىمداردى باسشىلىققا الا وتىرىپ، نىسان، ەلدى مەكەن، كوشە نەمەسە داڭعىل اتاۋى تاڭدالادى.
جاڭا اتاۋ بەرۋ جۇمىستارىن وڭتايلاندىرۋ ءۇشىن رەسپۋبليكالىق ونوماستيكا كوميسسياسى ورتاق تاريحي سانانى قالىپتاستىرىپ، بىرىزدىلىكتى قامتاماسىز ەتەتىن «تاريحي تۇلعالار» ءتىزىمىن ازىرلەگەن. ول تىزىمگە مەملەكەت پەن قوعامنىڭ دامۋىنا ۇلەس قوسقان قايراتكەرلەردىڭ ەسىمى كىرەدى. جاڭا اتاۋ بەرۋ نەمەسە ەسكىرگەن اتاۋدى وزگەرتۋ كەزىندە وسى تىزىمگە ەنگەن تۇلعالار ەسىمى نۇسقا رەتىندە قاراستىرىلادى. سونداي- اق، جاڭا اتاۋ بەرۋگە نەمەسە ەسكىرگەن اتاۋدى وزگەرتۋگە قاتىستى كەز كەلگەن وزگەرىس جەرگىلىكتى تۇرعىندارمەن تالقىلانىپ، ولاردىڭ پىكىرى ەسكەرىلەدى.
بۇل رەتتە پرەزيدەنت قاسىم-جومارت توقايەۆتىڭ 2022 -جىلعى قازاقستان حالقىنا جولدانۋىندا ايتقان ۇسىنىسىن مىسالعا كەلتىرۋگە بولادى. پرەزيدەنت جولداۋىندا «ەگەر جۇرتشىلىق قاپشاعاي قالاسىنا حالقىمىزىدىڭ ءبىرتۋار تۇلعاسى - دىنمۇحامەد قونايەۆتىڭ ەسىمىن بەرۋ كەرەك دەپ ۇسىنسا، بۇل پىكىرگە قوسىلىپ، قولدايتىنىن» ايتقان بولاتىن.
مەملەكەت باسشىسى مۇنى ازاماتتاردىڭ ۇسىنىس، پىكىرلەرىنە سۇيەنىپ ايتقانىن جەتكىزدى. وسىدان كەيىن تالقىلادۋىڭ بىرنەشە كەزەڭىنەن ءوتىپ، قولداۋ تاپقاننان كەيىن قالاعا قونايەۆ اتاۋى بەرىلدى.
جالپى بىلتىر 68 ەلدى مەكەن اتاۋى وزگەرتىلگەنىن اتاپ وتكەن ءجون. بۇدان بولەك مەملەكەت باسشىسى قاسىم- جومارت توقاۆتىڭ تاپسىرماسىن ورىنداۋ ماقساتىندا جاڭادان قۇرىلعان ءۇش جاڭا وبلىسقا اتاۋ بەرىلدى. ونوماستيكا باسقارماسىنىڭ باسشىسى ەلەركە تورەحان ءۇش وبلىس اتاۋى تەك مەملەكەتتىك تىلدە بەكىتىلگەنىن اتاپ ءوتتى. بۇدان بولەك بىلتىر تاعى 572 قۇرامداس بولىكتىڭ اتاۋى وزگەرتىلگەنى ايتىلدى.
